Холливудын алдарт жүжигчин, өдгөө 59 настай Холли Берри зургаан жил үерхсэн найз залуу, хөгжимчин Ван Ханттай (Van Hunt) албан ёсоор сүй тавьснаа зарлалаа. Энэ нь түүний амьдралын дөрөв дэх гэрлэлт болох юм.
Жүжигчин бүсгүй Жимми Фэллоны хөтлөн явуулдаг алдартай шоу нэвтрүүлэгт оролцохдоо хувийн амьдралынхаа талаарх цуурхалд цэг тавьжээ. Тэрээр 2022 оноос хойш шүтэн бишрэгчдийнх нь дунд гарсан “гэрлэх саналаас татгалзсан” гэх мэдээллийг үгүйсгэж, “Би түүний саналд эргэлзээгүйгээр ‘тийм’ гэж хариулсан, бид зүгээр л хуримын товоо хараахан тогтоогоогүй байсан юм” хэмээн тайлбарласан байна.
Сүйн бөгж ба гэр бүлийн амьдрал
Нэвтрүүлгийн үеэр Холли Берри сүйт залуугаасаа авсан нүсэр бөгжөө үзүүлсэн нь олны анхаарлыг ихэд татав. Алтан суурьтай, төв хэсэгтээ том очир эрдэнэтэй, геометр дүрс бүхий уг бөгж нь түүний өөртөө итгэлтэй сонголтыг илтгэж байлаа.
Холли Берри өмнө нь бейсболчин Дэвид Жастис, дуучин Эрик Бене болон жүжигчин Оливье Мартинес нартай гэрлэж байсан түүхтэй. Тэрээр өмнөх харилцаанаасаа төрсөн 17 настай Нала, 12 настай Масео гэх хоёр хүүхэдтэй бол түүний сүйт залуу Ван Хант мөн нэг хүүтэй юм. Тэдний харилцаа 2021 оны хавраас олон нийтэд ил болсон бөгөөд Холли энэ удаагийн шийдвэрээ маш нухацтай, ямар нэгэн шахалтгүйгээр гаргасан гэдгээ онцолжээ.
