Монгол Улс барилгын гол материалын нэг болох гипсэн хавтангийн импортод жил бүр 100 тэрбум төгрөг гадагш урсгадаг. Тэгвэл энэхүү хамаарлыг бүрмөсөн эцэслэж, дотоодын хэрэгцээг 100 хувь хангах хүчин чадалтай “Альфа” эко гипсэн хавтангийн үйлдвэр Төв аймгийн Сэргэлэн сумын нутагт албан ёсоор үүд хаалгаа нээлээ. Тус үйлдвэрийг үндэсний томоохон бүтээн байгуулагч “Нью прогресс групп”-ын охин компани болох “Эко драйвал” ХХК ашиглалтад оруулж байна.
Үйлдвэрийн нээлтийн хүндэтгэлийн ёслолд Монгол Улсын Ерөнхийлөгч У.Хүрэлсүх оролцож, групп болон компанийн хамт олонд түүхэн амжилт хүслээ. Тэрбээр барилгын салбарын аж ахуйн нэгжүүд болон нийт иргэдийг үндэсний үйлдвэрлэлээ дэмжиж, эх оронч худалдан авалт хийхийг уриалсан юм. Энэхүү үйлдвэр нээгдсэнээр орон нутгийн 100 гаруй иргэн тогтмол ажлын байраар хангагдаж, амьжиргаагаа дэмжих боломж бүрдэж байна.
Гипсэн хавтангийн хэрэглээний өсөлт ба төрөөс баримтлах бодлого
Манай улсын барилгын салбарт гипсэн хавтангийн хэрэглээ сүүлийн жилүүдэд эрчимтэй өсөж байгааг дараах тоо баримт илтгэнэ:
- 2023 онд: Монгол Улс 8.8 сая м2 гипсэн хавтан импортолж байв.
- 2025 онд: Энэхүү үзүүлэлт хоёр дахин нэмэгдэж, 18.5 сая м2-д хүрч өсжээ.
Салбарын яамны зүгээс цаашид дотоодын үйлдвэрлэгчдийг зөвхөн импортыг орлох бус, экспортын чиг баримжаатай, нэмүү өртөг шингэсэн, олон улсын стандартад нийцсэн бүтээгдэхүүн үйлдвэрлэхэд нь бодлогоор дэмжих зорилт тавин ажиллаж байна.
“Нью прогресс групп”-ын тухай
Энэхүү төслийг хэрэгжүүлэгч “Нью прогресс групп” нь 2000 оноос хойш дэд бүтэц, үйлдвэрлэл, эрчим хүч, барилгын салбарт тасралтгүй үйл ажиллагаа эрхэлж буй туршлагатай хамт олон юм. Өдгөө 10 гаруй охин компани, 1,500 гаруй ажилтантайгаар үндэсний бүтээн байгуулалтад гар бие оролцож байна. Тус группийн өмнөх томоохон бүтээн байгуулалт болох “Ховд эко цемент” үйлдвэр нь жилд 250 мянган тонн цемент үйлдвэрлэж, баруун бүсийн хэрэгцээг бүрэн хангаж байгаа бөгөөд энэ нь жилд 504 хүүхдийн цэцэрлэг барих хэмжээний түүхий эд юм.
