Португалийн шигшээ багийн ахлагч, хөлбөмбөгийн амьд домог Криштиану Роналду өдгөө өрнөж буй 2026 оны дэлхийн аварга шалгаруулах тэмцээн түүний карьерын хамгийн сүүлчийн ДАШТ байх болно гэдгийг албан ёсоор баталлаа. Алдартай итали сэтгүүлч Фабрицио Романо түүний энэхүү сэтгэл хөдөлгөсөн ярилцлагыг өөрийн Х цахим хуудсандаа нийтэлжээ.
Хором мөч бүрийг таашаах хэрэгтэй
Роналду хөлбөмбөгийн талбай дээрх гайхалтай замналынхаа сүүлчийн бүлгийг бичиж байгаа бөгөөд энэ удаагийн тэмцээнд маш их ач холбогдол өгч байгаагаа илэрхийлэв.
“Миний сүүлчийн дэлхийн аварга (инээв)… Эцэст нь хэлэхэд хүмүүс л үлддэг. Бидэнд хайртай, бид тэдэнд онцгой мөчүүдийг бэлэглэж чадах тэр л хүмүүс үлддэг. Мөн бидэнтэй хамт зүтгэж буй хүмүүсийг би харж байна. Энэ бол гайхалтай дурсамж. Зүгээр л хором мөч бүрийг таашаах хэрэгтэй. Тийм ээ, энэ бол миний сүүлчийн дэлхийн аварга байх болно. Үүнийг бүрэн дүүрэн мэдрэх хэрэгтэй.”
Түүхэн дэх хамгийн агуу амжилтын эзэн
Өдгөө 41 настай ч дэлхийн шилдэг хэвээр байгаа португал довтлогч маань хөлбөмбөгийн түүхэн дэх хамгийн агуу тоглогчдын нэг билээ. Түүний карьерын гол ололтуудаас дурдвал, тэрээр Аваргуудын лигт 5 удаа түрүүлж, Европын аварга болж, Үндэстнүүдийн лигт 2 удаа аваргалж байв. Мөн тэрээр үндэсний шигшээ баг, Европын аварга, Аваргуудын лиг, Клубүүдийн ДАШТ-ий түүхэн дэх хамгийн олон гоол оруулсан рекордуудыг ганцаараа эзэмшдэг төдийгүй хөлбөмбөгийн хамгийн нэр хүндтэй шагнал болох “Алтан бөмбөг” (Ballon d’Or)-ыг 5 удаа хүртсэн юм.
Роналду 2022 оны арванхоёрдугаар сараас хойш Саудын Арабын “Аль-Наср” клубт тоглож байгаа бөгөөд карьерынхаа явцад Португалийн “Спортинг”, Английн “Манчестер Юнайтед”, Италийн “Ювентус”, Испанийн “Реал Мадрид” клубудэд гялалзаж явсан билээ.
ДАШТ-2026 тэмцээний тухай
Энэ удаагийн тэмцээн нь хөлбөмбөгийн түүхэнд хэд хэдэн онцлогтой өрнөж байна:
- Тэмцээн АНУ, Канад, Мексик улсуудад зургаадугаар сарын 11-нээс долдугаар сарын 19-ний хооронд зохион байгуулагдаж байна.
- Өмнөх дэлхийн аваргын алтан цомыг Лионель Месси ахлагчтай Аргентины шигшээ баг эзэмшиж байгаа бөгөөд тэд титмээ хамгаалахаар өрсөлдөж байна.
