Бангладеш улсад өвөрмөц зүс, төрхөөрөө олны анхаарлыг татаад буй “Дональд Трамп” хочтой ховор цагаан одос үхрийн зураг цахим сүлжээнд хүчтэй тархаж байна.
Ойролцоогоор 700 кг жинтэй энэхүү амьтан Нараянганж хотод өссөн бөгөөд цайвар шаргал биетэй, өвөрмөц шаргал үстэй аж. Уг одос үхрийг АНУ-ын Ерөнхийлөгч Дональд Трампын үсний засалттай туйлын төстэй харагддаг учраас ийнхүү түүний нэрээр дуудах болжээ. Том биетэй атлаа номхон дөлгөөн зан араншинтай “Дональд Трамп” энэ жилийн хамгийн их хүн татсан амьтдын нэг болоод байна.
Бангладеш улсад альбинос буюу цагаан одос үхэр маш ховорт тооцогддог. Учир нь ихэнх одос үхэр бараан арьстай байдаг тул энэ амьтан Eid al-Adha (Курбан айт) баярын малын худалдаан дээр онцгой үзмэр болжээ. Сүүлийн жилүүдэд ер бусын том биетэй эсвэл өвөрмөц төрхтэй амьтад тус баярын өмнөхөн олны анхаарлыг татаж, сошиал сүлжээ болон орон нутгийн иргэдийн гол ярианы сэдэв болдог уламжлал тогтоод байна.
Фермийг зорих хүмүүсийн цуваа
Амьтны эзэн Зиа Уддин Мридхагийн хэлснээр, нийслэл Дака хотын ойролцоох Нараянганж дахь түүний фермд тавдугаар сарын турш хүмүүс тасралтгүй ирж сонирхжээ.
Таван найз, хамаатныхаа хамт ирсэн нэгэн зочин: “Энэ одос үхэр, Ерөнхийлөгч Дональд Трамп хоёрын төрх үнэхээр ижилхэн юм. Миний дүү хүү Дональд Трампыг үзэхийн тулд нэг цаг завиар явж ирсэн” хэмээн сэтгэгдлээ хуваалцсан байна.
Эцсийн мөч: Тахилын баяр
Гэвч энэ сарын сүүлээр болох “Тахилын баяр”-ын үеэр Бангладеш улс даяар нядлах 12 сая малын нэгэн адил энэ одос үхрээр мөн тахил өргөх бололтой.
Сүүлийн нэг жилийн турш дөрвөн настай энэ амьтныг өсгөсөн Зиа Уддин Мридха харамсангуйгаар: “Би Дональд Трампаа санах байх” гэж хэлжээ.
