Монгол Улсын Засгийн газраас эрчим хүчний хараат бус байдлыг хангах, сэргээгдэх эрчим хүчний эх үүсвэрийг нэмэгдүүлэх зорилгоор “Байдрагийн усан цахилгаан станц” төслийг хэрэгжүүлэх шийдвэр гаргалаа. Уг томоохон бүтээн байгуулалтыг төр, хувийн хэвшлийн түншлэлийн “зураг төсөл боловсруулах, байгаль орчны нарийвчилсан үнэлгээ хийх, барих, ашиглах, шилжүүлэх” гэрээний загвараар явуулахаар тогтсон байна. Үүнтэй холбогдуулан төслийн хувийн хэвшлийн түншлэгчийг сонгон шалгаруулах ажлыг хууль журмын дагуу шуурхай зохион байгуулахыг Монгол Улсын Тэргүүн шадар сайд бөгөөд Эдийн засаг, хөгжлийн сайд Ж.Энхбаяр, Эрчим хүчний сайд Б.Найдалаа нарт албан ёсоор даалгажээ.
Төслийн Техник, эдийн засгийн үндэслэлд (ТЭЗҮ) тусгагдсанаар тус станцын ажлыг урт хугацааны төлөвлөгөөтэйгөөр гүйцэтгэхээр тооцсон байна. Нийт 25 жилийн хугацаанд үргэлжлэх уг төслийн цаг хугацааны үндсэн үе шатуудыг багцалбал:
- 2026-2030 он: Усан цахилгаан станцын барилга угсралт, бүтээн байгуулалтын үндсэн ажлуудыг хийж гүйцэтгэнэ.
- 2030-2055 он: Тухайн станцын идэвхтэй ашиглалт, урсгал засвар, техникийн үйлчилгээг хувийн хэвшлийн тал хариуцан ажиллаж, улмаар төрд хүлээлгэн өгнө.
Энэхүү усан цахилгаан станц ашиглалтад орсноор төвийн бүсийн эрчим хүчний системийн суурилагдсан хүчин чадал болон дотоодын үйлдвэрлэлийн хэмжээ бодитоор өсөх юм. Сэргээгдэх эрчим хүчний эл дэвшилтэт технологи нь байгаль орчин болон хүний эрүүл мэндэд ямар нэгэн сөрөг нөлөөгүй гэдгээрээ онцлогтой. Уснаас эрчим хүч гарган авснаар нүүрсний хэрэглээнээс үүдэлтэй хүлэмжийн хийн ялгарлыг үлэмж хэмжээгээр бууруулж, иргэд эрүүл, аюулгүй орчинд амьдрах таатай нөхцөлийг бүрдүүлэхэд жинтэй хувь нэмэр оруулах ач холбогдолтой хэмээн албаныхан үзэж байна.
