Монголын сагсан бөмбөгийн спортод 22 гаруй жил тууштай зүтгэж, улсынхаа нэрийг олон улсын тавцанд цуурайтуулсан “Хасын Хүлэгүүд” багийн холбон тоглогч Отгонбаатарын Сэргэлэн Монгол Улсын Гавьяат тамирчин (МУГТ) хүндтэй цолыг хүртэхээр боллоо. Тэрбээр Монголын сагсан бөмбөгийн түүхэнд хамгийн тогтвортой бөгөөд амжилттай тоглосон тамирчдын нэг бөгөөд 12 жилийн турш үндэсний шигшээ багийн бүрэлдэхүүнд тасралтгүй дуудагдсан бахархам түүхтэй билээ.
Дээд лигийн долоон удаагийн аварга ба олон улсын амжилтууд
Олон Улсын Хэмжээний Мастер О.Сэргэлэнгийн спортын замнал гайхалтай ялалт, шагналуудаар дүүрэн байдаг. Тэрбээр дотоодын Дээд лигийн тэмцээнд 2014, 2017, 2018, 2022, 2024, 2025 болон 2026 онуудад нийт долоон удаа аваргалж, 2016, 2019, 2020 онуудад дэд аварга, 2015 болон 2023 онуудад хүрэл медаль хүртэж байв. Мөн 2018-2019 оны улиралд лигийн Тэргүүн тоглогч (MVP) хэмээх эрхэм хүндтэй шагналын эзэн болсон юм.
Түүний амжилт зөвхөн Монголоор хязгаарлагдахгүй. О.Сэргэлэн 2014 оны Инчеоний Азийн наадамд шигшээ багийн хамт шилдэг найман багийн нэгээр шалгарч байсан түүхтэй. Түүнчлэн 2025 онд Зүүн Азийн Клубуудын Аварга шалгаруулах тэмцээнд (BCL East Asia) алтан медаль, Азийн Клубуудын Аварга шалгаруулах тэмцээнээс (BCL ASIA) хүрэл медаль тус тус хүртэж, тивдээ данстай холбон тоглогч гэдгээ батлан харуулсан билээ.
Ирээдүйн одуудыг бэлтгэж буй “PG Academy”
Тэрбээр зөвхөн өөрийн амжилтаар зогсохгүй сагсан бөмбөгийн залгамж халааг бэлтгэх үйлсэд сэтгэл зүрхээ зориулж явна. О.Сэргэлэн 2023 онд өөрийн “PG Academy”-ийг үүсгэн байгуулсан бөгөөд өдгөө 800 гаруй хүүхэд багачуудад сагсан бөмбөгийн спортын анхан шатны мэдлэг, зөв техникийг зааж сурган дасгалжуулж байна. Түүний удирдсан академийн залуу тамирчид улс болон хотын чанартай тэмцээнүүдэд амжилттай оролцож, ирээдүйн Монголын шилдэг сагсчид болох гараагаа эхлүүлээд байна.
