Казахстан улсад үргэлжилж буй “PGL Astana 2026” тэмцээний хүрээнд Монголын баг тамирчдад хүндэтгэл үзүүлсэн нэгэн сонирхолтой үйл явдал боллоо. Тэмцээний хөтлөгч Жеймс “BanKs” Бэнкс өөрийн нэвтрүүлэгтээ “The MongolZ” багийг урьж, Ази тивийн цахим спортын түүхэнд шинэ хуудас нээснийг нь онцлон тэмдэглэв. Тэрээр багийн залууст хүндэтгэл үзүүлж, тэдний гаргасан түүхэн амжилтад зориулан тусгай шагнал гардуулсан юм.
Жеймс Бэнкс шагнал гардуулах үедээ “The MongolZ” баг 2025 оны есдүгээр сард “Valve Corporation”-ийн дэлхийн чансааг тэргүүлсэн нь Монгол төдийгүй бүх Азийн цахим спортын түүхэнд тохиосон хамгийн чухал үйл явдал байсан гэдгийг онцлов. Тус баг дэлхийн оргилд гарсан анхны Азийн баг болж чадсаныг ийнхүү олон улсын тавцанд өндрөөр үнэлж байна.
Багийн гишүүдэд гардуулсан уг шагнал нь дараах өвөрмөц хийцтэй аж:
- Материал: 9 каратын алтаар бүхэлд нь урласан.
- Чимэглэл: Байгалийн хар алмаазаар чимэглэж, үнэ цэнийг нь нэмэгдүүлсэн.
- Дизайн: Бөгжний нүүрэн талд “The MongolZ” багийн логог товойлгон гаргаж өгсөн.
Одоогийн байдлаар манай баг дэлхийн чансааны 5-д бичигдэж, чансаа өндөр багуудын эгнээнд баттай зогсож байна. Энэхүү дурсгалын алтан бөгж нь тэдний хөдөлмөр, хичээл зүтгэл болон Азийн цахим спортын түүхийг өөрчилсөн гавьяаны илэрхийлэл болон үлдэх юм.
