Байгаль хамгаалагчдын өдөр тутмын хяналт шалгалт болон шуурхай эргүүлийн ажлыг хөнгөвчлөх зорилгоор техник хэрэгслийн шинэчлэл хийлээ. Тодруулбал, Хамгаалалтын захиргааны байгаль хамгаалагч нарт 2026 онд БНХАУ-д үйлдвэрлэсэн “SUPER GO PRO 150” маркийн мотоциклуудыг хүлээлгэн өгсөн байна.
Уг техникүүдийг худалдан авах санхүүжилтийг Хамгаалалтын захиргааны 2025 оны төлөвлөгөөнөөс давсан орлогын эх үүсвэрээр шийдвэрлэсэн нь онцлог юм. Энэхүү хөрөнгө оруулалт нь байгаль хамгаалагчдын ажиллах нөхцөлийг сайжруулаад зогсохгүй, тусгай хамгаалалттай газар нутгийн аюулгүй байдал, хяналтыг шинэ шатанд гаргах ач холбогдолтой.
Мотоциклтой болсноор байгаль хамгааллын үйл ажиллагаанд дараах бодит үр дүнгүүд гарна:
- Тусгай хамгаалалттай газар нутгийн хяналт хамгаалалтыг илүү үр дүнтэй хэрэгжүүлэх боломж бүрдэнэ.
- Байгаль хамгааллын үйл ажиллагааны шуурхай байдал болон хүртээмж эрс нэмэгдэнэ.
- Байгаль хамгаалагчдын ажиллах орчин, нөхцөл сайжирч, ажлын бүтээмж дээшилнэ.
Энэхүү шинэ техникүүд нь байгаль орчноо хамгаалах, зөрчлөөс урьдчилан сэргийлэхэд томоохон дэмжлэг болно гэдгийг албаныхан онцолж байв. Цаашид ч техникийн хүчин чадлыг нэмэгдүүлэх замаар байгаль хамгааллын менежментийг боловсронгуй болгохыг зорьж байна.
