Монгол Улсын Засгийн газрын хуралдаанаас зөвшөөрөлтэй холбоотой бүхий л шийдвэрлэлийг цахим хэлбэрт бүрэн шилжүүлэхийг төрийн байгууллагуудад үүрэг болголоо. Үүнд зөвшөөрөл олгох, сунгах, түдгэлзүүлэх, сэргээх, хүчингүй болгох зэрэг бүх процесс хамаарна.
Шинэ журам, шаардлагууд:
- Зөвшөөрлийн тухай хуульд заасан хугацаанд шийдвэр гаргах
- Шат дамжлагыг багасгах, хэм хэмжээг мөрдөх
- Захиргааны хэм хэмжээний актыг хуульд нийцүүлэн батлах
- “Хур” системээр баримт бичиг, мэдээллийг баталгаажуулах
- Цахим төлбөрийн баримтаар зөвшөөрөл эзэмшигчийн үйл ажиллагааг хянах
- “И-Монгол” системээр шийдвэрийг иргэнд мэдэгдэх
- e-business.mn системд нэгтгэн хүргэх
Эдгээр ажлыг 2025 оны тавдугаар сарын 1-ний дотор бүрэн хэрэгжүүлэхийг Засгийн газрын гишүүд, аймаг, нийслэлийн Засаг дарга нарт даалгасан бөгөөд, холбогдох системийн хөгжүүлэлт, мэргэжил арга зүйн дэмжлэгийг Санхүүгийн мэдээллийн технологийн төв болон “И-Монгол” УТҮГ хариуцан гүйцэтгэх юм.
Одоогийн нөхцөл байдал:
- “license.mn” системээр 76 төрлийн тусгай зөвшөөрөл олгож байна
- “e-business.mn” системээр 43 төрлийн зөвшөөрөл
- Эрх бүхий байгууллагууд өөрийн системээр 116 зөвшөөрөл олгож байгаа
- Зөвшөөрлийн нэгдсэн санд нийт 151,746 нэгж мэдээлэл бүртгэгдсэн
- 73 зөвшөөрөл цаасан хэлбэрээр олгогдож байна
Энэхүү цахим шилжилт нь зөвшөөрөл олголтын ил тод, шуурхай, үр ашигтай байдлыг нэмэгдүүлж, иргэд, аж ахуйн нэгжүүдэд төрийн үйлчилгээг илүү хүртээмжтэй болгоно гэж үзэж байна.
