Дэлхийн хэмжээнд ойролцоогоор 417 сая хүүхэд ядууралд амьдарч байна. Орлогын дутагдал, дайн мөргөлдөөн, уур амьсгалын өөрчлөлт зэрэг хүчин зүйлс нь тэднийг суурь үйлчилгээ авах боломжгүй болгож, энэ асуудлыг бууруулах ахиц сүүлийн жилүүдэд саарсан тухай НҮБ-ын Хүүхдийн сан ЮНИСЕФ-ийн жил тутмын тайланд дурджээ.
Хүүхдийн ядуурлыг боловсрол, эрүүл мэнд, орон байр, хоол тэжээл, ариун цэвэр, ус хангамж гэсэн зургаан үндсэн үзүүлэлтээр үнэлдэг. Судалгаагаар 118 сая хүүхэд эдгээрээс гурав ба түүнээс олон төрлийн ноцтой хомсдолд, 17 сая хүүхэд дөрөв ба түүнээс олон хомсдолд өртөж байна.
Тухайлбал, аюулгүй ундны ус, урьдчилан сэргийлэх эмнэлгийн үйлчилгээ, боловсролд хүрэх боломжгүй байдал нь олон сая хүүхдийг ядуурал руу түлхэж байна. Үүний улмаас бага болон дунд орлоготой орнуудын таван хүүхэд тутмын нэгээс илүү нь таагүй нөхцөлд амьдарч байгаа гэсэн үг.
Хүүхдийн олон талт ядуурлын хамгийн өндөр түвшин Сахарын цөлийн өмнөд хэсгийн Африк, Өмнөд Азид бүртгэгджээ. Жишээ нь, Чад улсад хүүхдийн 64 хувь нь хоёр ба түүнээс дээш ноцтой хомсдолд, бараг 25 хувь нь гурав ба түүнээс дээш хомсдолд өртдөг байна.
Ариун цэврийн нөхцөл хамгийн түгээмэл бөгөөд хамгийн хүнд хэлбэрийн дутагдалд тооцогдож байна. Бага орлоготой орнуудад хүүхдийн 65 хувь нь жорлонгийн хүртээмжгүй, орлого доогуур дунд түвшний орнуудад 26 хувь, орлого дунд түвшнээс дээш орнуудад 11 хувь нь ийм нөхцөлд амьдарч байна. Ариун цэврийн дутмаг байдал нь халдварт өвчинд өртөх эрсдэлийг нэмэгдүүлдэг.
Тайланд мөн бага болон дунд орлоготой орнууд дахь нэг буюу хэд хэдэн ноцтой хомсдолд өртсөн хүүхдийн хувь 2013 онд 51 хувь байсан бол 2023 онд 41 хувь болж буурсан гэжээ. Энэ нь хүүхдийн эрхийг үндэсний бодлого, эдийн засгийн төлөвлөлтөд илүү чухалчилсны үр дүн боловч ахиц одоо удааширч байна. Дайн мөргөлдөөн, уур амьсгал ба экологийн хямрал, хүн ам зүйн өөрчлөлт, өсөж буй улсын өр, технологийн ялгаа зэрэг нь ядуурлыг улам гүнзгийрүүлж байна.
Blick сэтгүүлийн мэдээлснээр, чинээлэгт тооцогддог Швейцарьт ч ойролцоогоор 340 мянган хүүхэд ядууралд амьдарч байгаа нь Вале кантон дахь хүн амын тоотой ойролцоо юм. Тэнд хүүхдийн ядуурал тогтмол өсөж, сүүлийн үед бүр дордсон байна. Ийм хүүхдүүд боловсролын боломж багатай, эрүүл мэнд—бие махбодын ч, сэтгэлзүйн ч—муудах хандлагатай бөгөөд өөрсдийгөө аюулгүй мэдрэх нь ч буурдаг гэж тайланд дурджээ.
