Олон улсын марафон гүйлтийн тэмцээнтэй холбогдуулан нийслэл хотын төв замуудыг түр хаах шийдвэр гарсантай уялдуулан нийтийн тээврийн үйлчилгээний маршрутуудад томоохон зохицуулалт хийхээр болжээ. Тэмцээний үеэр авто замын зорчих хэсгийн хөдөлгөөнийг хязгаарлах тул нийт 55 чиглэлийн 506 тээврийн хэрэгслийн маршрутад өөрчлөлт орох бөгөөд хаагдаж буй замуудаар дайран өнгөрдөг таван гол чиглэлийн автобусны үйлчилгээг бүрэн зогсоохоор шийдвэрлэсэн байна.
Энхтайвны өргөн чөлөө болон Нарны замын тодорхой хэсгүүд хаагдах тул авто замын дийлэнх хөдөлгөөн Их тойруугаар зорчих юм. Нийтийн тээврийн хөдөлгөөн урсгалыг дараах байдлаар зохицуулна:
- Хойноос ирж буй чиглэлүүд: Сансрын тойрог дээр буцаж эргэнэ.
- Урдаас орж ирж буй чиглэлүүд: 120 мянгат дээр буцаж эргэнэ.
Тэмцээний үндсэн маршрут болон хаагдаж буй замуудаар үйлчилгээ үзүүлдэг дараах нийтийн тээврийн 5 чиглэл бүрэн зогсох тул иргэд та бүхэн хөдөлгөөнөө урьдчилан төлөвлөнө үү:
- Ч63 чиглэл
- Ч71 чиглэл
- Ч71а чиглэл
- Ч84 чиглэл
- Ч78 чиглэл
Авто замын хөдөлгөөнийг тухайн өдрийн оройн 18:00 цагт бүрэн нээх бөгөөд үүний дараа нийтийн тээврийн үйлчилгээний автобусууд түр явж байсан замаасаа үндсэн маршрут руугаа шууд шилжин орж, үйлчилгээ хэвийн үргэлжлэх хуваарьтай байна.
