Монгол Улсын Ерөнхийлөгчийн ивээл дор зохион байгуулагдаж буй “Улаанбаатар 2026” Олимпын таеквондогийн Ази тивийн аварга шалгаруулах тэмцээн өндөрлөх дөхөж байна. Тэмцээнд 43 орны баг тамирчид хуран цуглаж, пүмзэ болон тулааны төрлийн аваргуудаа хэдийн тодруулсан бол өдгөө пара таеквондогийн шилдгүүд тодорч эхэллээ. Энэхүү хариуцлагатай дэвжээнээс манай улсын пара таеквондогийн одод гайхалтай ялалт байгуулж, эх орныхоо төрийн дууллыг эгшиглүүлсэн байна.
Тухайлбах, эмэгтэйчүүдийн 52 кг-ын жинд хүч үзсэн “Парис 2024” Паралимпын наадмын аварга, Хөдөлмөрийн баатар У.Сүрэнжав шийдвэрлэх тулаанд Узбекистаны Рустамова Кароматойг 2:1-ийн харьцаатайгаар буулган авчээ. Мөн эрэгтэйчүүдийн К44 ангиллын -63 кг-ын жинд “Парис 2024” Паралимпын наадмын мөнгөн медальт, дэлхийн аварга, гавьяат тамирчин Г.Болор-Эрдэнэ Ираны Садегианпур Саидыг ялж, алтан медаль хүртлээ.
Тэмцээний үеэр манай тамирчдын тогтоосон онцлох амжилтууд:
- У.Сүрэнжав: Азийн аварга шалгаруулах тэмцээнд гурав дахь удаагаа түрүүлж буй тэрбээр өдгөө өөрийн жиндээ дэлхийн чансааг тасралтгүй тэргүүлж байна.
- Г.Болор-Эрдэнэ: Шигшээ тулаанд өрсөлдөгчөө илүүрхсэнээр тэрбээр Ази тивийн аваргаар зургаа дахь удаагаа тодорч, бахдам амжилт үзүүллээ.
