Америкийн алдарт жүжигчин, тулааны урлагийн мастер Чак Норрис 86 насандаа таалал төгслөө.
Чак Норрисын гэр бүлийнхэн албан ёсны мэдэгдэл гаргаж, түүний үхлийг батлав. Ойр дотных нь мэдээлснээр, жүжигчин 3-р сарын 19-ний өглөө гэнэт амьсгал хураажээ. Тэд мэдэгдэлдээ “Бидний хайрт Чак Норрис” хэмээн дурдаад, энэ явдал гэр бүлийнхэнд нь нөхөж баршгүй гарз хохирол болсныг онцолсон байна.
Мөн түүнийг амьсгал хураах мөчид ганцаараа байгаагүй бөгөөд “гэр бүлийнхнээрээ хүрээлүүлж, маш тайван байдалтай байсан” гэдгийг гэр бүлийнхэн нь тэмдэглэжээ. Мэдэгдэлд “Тэрээр дэлхий дахины хувьд тулааны урлагийн мастер, нэрт жүжигчин, хүч чадлын бэлгэдэл байсан бол бидний хувьд халамжит хань, хайрт аав, өвөө бөгөөд гэр бүлийн маань зүрх сэтгэл байсан юм” гэж дурдсан байна.
Гэр бүлийнхэн нь түүнийг дэмжиж ирсэн шүтэн бишрэгчдэд нь талархал илэрхийлээд, тэдний хайр халамж Чакын хувьд маш их үнэ цэнтэй байсныг дурджээ. Мөн сүүлийн өдрүүдэд түүний эрүүл мэндийн төлөө залбирч байсан хүмүүст талархаж, энэ хүнд цаг үед гэр бүлийнхнийх нь хувийн орон зайг хүндэтгэхийг хүссэн байна.
Чак Норрисын үхлийн өмнө юу болов?
Түүний таалал төгссөн тухай мэдээтэй зэрэгцэн барууны хэвлэлүүд жүжигчний эрүүл мэндийн асуудлыг эргэн сануулж байна. Хавайн Кауаи арал дээр амарч байх үедээ 86 настай жүжигчин гэнэт бие нь тавгүйрхэж, эмнэлгийн яаралтай тусламж авсан юм.
TMZ порталын мэдээлснээр, уг явдлын өмнөхөн Норрисын бие сайн байсан бөгөөд тэрээр идэвхтэй хөдөлж, бэлтгэл сургуулилтаа ч үргэлжлүүлж байжээ. Түүний найз нь хэрэг явдал болохоос хэдхэн хоногийн өмнө утсаар ярихад жүжигчин маш өөдрөг, сэтгэл санаа нь сайхан байсан тухай ярьсан байна.
Энэхүү харамсалтай явдал түүний төрсөн өдрөөс ердөө долоо хоног гаруйн дараа тохиолоо. Тэрээр төрсөн өдрөөрөө бэлтгэл хийж буй бичлэгээ шүтэн бишрэгчидтэйгээ хуваалцаж, 86 настай ч хэвээрээ байгаагаа харуулсан юм. Тэрээр бичлэгийнхээ тайлбар дээр “Би хөгшрөхгүй байна, харин дараагийн түвшинд гарч байна” хэмээн хошигнож байжээ.
Чак Норрисын товч намтар
Жинхэнэ нэр нь Карлос Рэй Норрис бөгөөд тэрээр 1940 оны 3-р сарын 10-нд Оклахома мужийн Райан хотод төржээ. Түүний хүүхэд нас санхүүгийн хүндрэл, гэр бүлийн асуудал дунд өнгөрсөн юм. Эцэг эх нь салсны дараа тэрээр ээж, дүү нарын хамт Калифорни руу нүүжээ.
1958 онд Норрис АНУ-ын Агаарын цэргийн хүчинд алба хааж эхлэв. Өмнөд Солонгост алба хааж байхдаа тэрээр тулааны урлагийг, тухайлбал “Танг-су-до”-г (Tang Soo Do) сонирхож эхэлсэн байна. АНУ-д буцаж ирээд бэлтгэлээ үргэлжлүүлж, өөрийн сургуулиудыг нээн, тэмцээн уралдаанд оролцох болжээ. Улмаар каратэгийн дэлхийн аварга цолыг хэдэн жилийн турш эзэмшсэн юм.
Тулааны урлаг дахь амжилтаараа тэрээр Холливудын оддыг дасгалжуулах болж, улмаар кино урлагт хөл тавьсан байна. Түүний анхны томоохон дүр нь 1972 онд Брюс Лигийн “Луугийн зам” (Way of the Dragon) кинонд домогт мастерын өрсөлдөгчийн дүр байлаа. Энэхүү дүр нь түүнийг кино ертөнцөд таниулсан юм.
1980-аад онд Норрис тулаант киноны гол оддын нэг болж, “Сүраггүй алга бологсод”, “Дельта хүчин”, “Ганц дайчин МакКуэйд” зэрэг олон бүтээлд тогложээ. Түүний хүчирхэг, дуу цөөтэй баатрын дүр дэлхий даяар алдаршсан юм. Хожим нь тэрээр “Техасын рейжер Уокер” цувралаараа нэр хүндээ баталгаажуулж, уг бүтээл нь шүтэн бишрэгчдийнх нь дунд домог болон үлдсэн билээ.
Жүжигчний карьераас гадна Норрис зохиолч, олон нийтийн зүтгэлтэн гэдгээрээ амжилтад хүрсэн. Тэрээр тулааны урлаг, гүн ухаан, өөрийгөө хөгжүүлэх сэдвээр хэд хэдэн бестселлер ном бичсэн юм. Мөн буяны үйлсэд идэвхтэй оролцож, залуучуудад зориулсан боловсролын хөтөлбөрүүдийг дэмждэг байв.
2000-аад оны үед тэрээр “Чак Норрисын тухай баримтууд” (Chuck Norris Facts) хэмээх интернэт мемийн ачаар шинэ үеийнхний дунд алдаршсан бөгөөд энэ нь түүнийг ер бусын хүч чадалтай нэгэн болгон дүрсэлдэг билээ. Хэдий тийм ч сая сая хүмүүсийн хувьд тэрээр зөвхөн хошигнолын баатар биш, харин кино урлаг болон тулааны урлагийн амьд домог болон үлдэх юм.
