2025 оны зургаадугаар сарын 2-нд “Дулааны цахилгаан станц-3” ТӨХК-д гарсан ослын улмаас нэг инженер амиа алдаж, нэг ажилтан угаартсан ноцтой хэрэг гарсан. Энэ осол нь зөвхөн хүний амь насны гарз хохирол төдийгүй нийслэлийн ирэх өвлийн дулаан хангамжид ч сөргөөр нөлөөлөх нөхцөл үүсгээд байна.
Ийм нөхцөлд өнөөдөр буюу зургаадугаар сарын 19-нд Ерөнхий сайд Г.Занданшатар, Эрчим хүчний сайд Б.Чойжилсүрэн нар “ТЭЦ-3” ТӨХК-д ажиллаж, нөхцөл байдалтай танилцлаа.
Энэ үеэр станцын захирал Л.Эрхбаатар дараах мэдээллийг өгсөн юм: “Манай станцын үйлдвэрлэл хэвийн үргэлжилж байгаа ч ослын улмаас 9 дүгээр машин бүрэн зогссон. Цагдаа, тагнуулын байгууллага болон техникийн шинжээчдийн шалгалт үргэлжилж байгаа учир гэмтлийн шалтгаан, хохирлын хэмжээ эцэслэн тогтоогдоогүй. Осол болсон хэсэгт орж ажиллах зөвшөөрөл хараахан ирээгүй.”
9 дүгээр турбин бүрэн зогсжээ
Тэрээр мөн мэдээлэхдээ: “Осолдсон 9 дүгээр турбин энэ өвөл огт ажиллахгүй. Гэсэн ч өнгөрсөн өвөлтэй дүйцэхүйц хэмжээний дулаан үйлдвэрлэл явуулах төлөвлөгөөтэй. Үүний хүрээнд тоног төхөөрөмж нэмж худалдан авах, зарим системийг сайжруулах арга хэмжээ авч эхэлсэн.”
“ТЭЦ-3” станц нь нийт есөн турбинтай бөгөөд өмнөх өвөл 7 дугаар турбин ажиллаагүй байсан. Энэ талаар тэрбээр: “Тухайн үед хяналтын байгууллагын дүгнэлтээр 7 дугаар турбины цилиндрийг солих шаардлагатай гэж үзсэн. Солих ажил арванхоёрдугаар сарын 1 гэхэд дуусахаар гэрээлэгдсэн. Иймээс энэ өвөл нэг турбин буюу 25 МВт нэмж ашиглалтад орох боломжтой. Бид наймдугаар сарын 1-нээс эхлэн төлөвлөгөөт зогсолт хийж, бүх турбинуудаа хяналт, тохиргоонд оруулахаар ажиллаж байна.”
