Шинжлэх ухаан, технологийн их сургуулийн багш нар Улаанбаатар хотын метроны төслийн хүрээнд мэргэжил дээшлүүлэх зорилгоор Бүгд Найрамдах Солонгос Улсад тусгай хөтөлбөрт хамрагдахаар явлаа.
Метроны инженерчлэлийн сургалтад хамрагдаж буй багш нар
Тус сургалт нь метроны инженерчлэлийн олон чиглэлийг хамарч байгаа бөгөөд ШУТИС-ийн тэнхим бүрээс дараах багш нар оролцож байна:
- Механик ба вагон зохион бүтээх хөтөлбөрт: Инженер, тээврийн сургуулийн багш О.Эрдэнэ-Очир болон Э.Уранбаяр
- Удирдлага ба хяналтын инженерчлэлийн хөтөлбөрт: Багш Ж.Азжаргал, Б.Дэлгэрмаа
- Метроны барилгын инженерийн хөтөлбөрт: Архитектурын сургуулийн багш Н.Саранчимэг, М.Цас-Оргилмаа
- Дохиолол ба цахилгааны инженерчлэлийн хөтөлбөрт: Мэдээлэл, харилцаа холбооны сургуулийн багш А.Сундий болон Эрчим хүчний сургуулийн багш Б.Энх-Амгалан
Хамтын ажиллагаа ба ирээдүйн төлөвлөгөө
ШУТИС болон БНСУ-ын Халла их сургууль хамтран хэрэгжүүлж буй “2+2” хөтөлбөрийн эхний шатанд 200 оюутныг метроны инженер, техникийн мэргэжилтнээр бэлтгэхээр тохиролцсон.
Энэхүү хамтын ажиллагаа нь замын түгжрэлийг бууруулах, нийтийн тээврийн хүртээмжийг нэмэгдүүлэх чухал ач холбогдолтой. Үүнээс гадна багш, оюутнуудыг “Duhua Engineering” компанид дадлага хийх, мэргэжлийн сургалтын систем нэвтрүүлэх, хамтарсан боловсролын тогтолцоо бүрдүүлэх зэрэг олон чиглэлээр хамтран ажиллаж байна.
Шинэ бакалаврын хөтөлбөрүүд 2025-2026 оноос эхэлнэ
Ирэх хичээлийн жилээс эхлэн ШУТИС дараах метроны чиглэлийн дөрвөн шинэ бакалаврын хөтөлбөр нээхээр төлөвлөжээ:
- Метроны удирдлага ба хяналт
- Метроны барилга
- Дохиолол ба цахилгаан хангамж
- Метроны механик ба вагон зохион бүтээл
Эдгээр хөтөлбөр нь Улаанбаатар хотын метроны төслийг мэргэжлийн боловсон хүчнээр хангах, дотоодын инженер, техникийн чадварлаг нөөцийг бий болгоход чиглэж байгаа юм.
