Баянзүрх дүүргийн 29 дүгээр хороо болон Сүхбаатар дүүргийн 13, 14 дүгээр хорооны нутагт Сэлбэ голын үерийн оргил урсцыг зохицуулах зориулалттай усан сангийн бүтээн байгуулалт үргэлжилж байна. Тус байгууламж нь 1.3 сая метр куб багтаамжтайгаар төлөвлөгдсөн бөгөөд нийслэлийн үерийн эрсдэлийг бууруулах чухал дэд бүтэцд тооцогдож байна.
“Сэлбэ сэргэлт” төслийн хүрээнд 50 орчим га талбайд таван шатлал бүхий усан сан болон хиймэл нууруудыг үе шаттай байгуулж байгаа бөгөөд барилгын ажлыг 2025 онд эхлүүлжээ. Одоогоор үерийн ус хуримтлуулах “С” усан сангийн барилга угсралтын ажил үргэлжилж байгаа бөгөөд газар чөлөөлөлтийн явц тодорхой түвшинд хэрэгжиж байна.
Төслийн хүрээнд газар ашиглалттай холбоотой дараах ажлууд хийгджээ:
- Газар эзэмших, өмчлөх эрхтэй 39 нэгж талбараас 11-ийг чөлөөлсөн
- Зөвшөөрөлгүй газар ашиглаж байсан 51 иргэн, хуулийн этгээдээс 36-ийн зөрчлийг арилгасан
Энэхүү усан сан ашиглалтад орсноор хотын төвлөрөл өндөртэй бүсэд Сэлбэ голын үерийн аюулыг бууруулахын зэрэгцээ 1.3 сая метр куб цэвэр усны нөөц бүрдүүлэх боломжтой болно. Мөн орчны чийгшил нэмэгдэж, амралт, аялал жуулчлалын шинэ орчин бүрдэхээр байгааг НЗДТГ-ын хэвлэлийн хэлтсээс мэдээлэв.
