Индонезийн Бали аралд зохион байгуулагдсан Зүүн өмнөд Азийн математикийн олимпиадаас Өмнөговь аймгийн сурагчид ганзага дүүрэн ирлээ. 2026 оны нэгдүгээр сарын 16-наас 19-ний хооронд болсон тус тэмцээнд дэлхийн 22 орны 25 мянга гаруй суут ухаантнууд мэдлэгээ уралдуулснаас говийн хүүхдүүд 13 медаль хүртэж, эх орныхоо нэрийг өндөрт өргөв.
Өмнөговь аймгийн 60 гаруй сурагчийн бүрэлдэхүүнтэй баг энэхүү нэр хүндтэй олимпиадад амжилттай оролцож, дараах шагналуудыг хүртсэн байна:
- Алтан медаль: Даланзадгад сумын 3-р сургуулийн 11а ангийн сурагч Э.Тэргэлсаран.
- Мөнгөн медаль: 1-р сургуулийн сурагч Д.Дөлгөөн (3в), А.Мөнхзаяа (8а).
- Хүрэл медаль: 1-р сургуулийн Б.Эрмүүн, Энхжин, А.Гантөр, Ц.Бадралмаа, Б.Сүхбаяр болон 3-р сургуулийн Б.Төгөлдөр, Н.Батням, М.Сэцэнбэхи, Г.Нэргүйцэцэг, Л.Отгонжаргал нар.
Өмнөговь аймгийн Боловсролын газрын мэргэжилтэн С.Мандахайгийн онцолсноор, энэ жилийн олимпиад сурагчдын хувьд илүү хүртээмжтэй байжээ. Өмнө нь хүүхдүүд эхний шатанд оролцохын тулд Улаанбаатар хотыг зорьдог байсан бол энэ удаад Даланзадгад сумандаа шалгалтаа өгөх боломж бүрдсэн байна. Тус аймгийн 23 сургуулийн 170 гаруй сурагч анхан шатны шалгаруулалтад орсноос 72 нь олон улсын шатанд өрсөлдөх эрхээ авчээ.
Хэдийгээр олон улсын шатны зардлыг сурагчид өөрсдөө хариуцан Индонезийг зорьсон ч ийнхүү өндөр амжилт үзүүлсэн нь орон нутгийн боловсролын чанарыг илтгэж байна. Говийн сурагчид дэлхийн хэмжээний математикчидтай өрсөлдөх бүрэн чадвартайгаа Балигийн тэнгэрт дахин нэгэнтээ баталж чадлаа.
