Нийслэл хотын хэмжээнд зохион байгуулагдсан нөөцийн махны өргөтгөсөн худалдааны хоёр дахь өдөр амжилттай өндөрлөж, хоёр өдрийн нэгдсэн дүн гарлаа. Өчигдөр буюу 2026 оны тавдугаар сарын 20-ны өдөр төвийн зургаан дүүргийн зургаан тусгай байршилд 10.00–18.00 цагийн хооронд махны нийлүүлэлтийг үргэлжлүүлсэн юм. Энэхүү худалдааны үр дүнд гэрээт аж ахуйн нэгжүүд болох Чойбалсан групп ХХК, Багануур Мах Маркет ХХК болон Агро нэгтгэл трэйд ХХК-иуд хамтран 3746.2 кг хонины мах, 8 мянга 822 кг үхрийн махыг зах зээлд нийлүүлжээ. Ингэснээр өчигдөр ганцхан өдрийн дотор нийт 12.5 тонн мах иргэдийн гарт очсон бөгөөд хоёр хоногийн нэгдсэн дүнгээр нийслэлчүүд нийт 26 тонн мах худалдан авсан байна.
Уг өргөтгөсөн задгай худалдаа нь үндсэндээ бэлтгэн нийлүүлэгч компаниудын санал болгосон логистикийн бэлтгэл ажлыг хангах, сүлжээ дэлгүүрүүд рүү түгээлт хийх суурь нөхцөлийг бүрдүүлэх зорилготой байв. Гэвч өчигдрөөс эхлэн томоохон супермаркетуудаар мах зарах үйлц явц эхэлсэн хэдий ч ханган нийлүүлэгчдийн зохион байгуулалт болон тээвэрлэлтийн саатлаас шалтгаалан зарим цэгүүдэд бүтээгдэхүүн дутуу хүрэх, тасалдах хүндрэл гарчээ. Үүссэн нөхцөл байдалтай холбогдуулан ХХААХҮЯ-ны сайд Ц.Идэрбат яаралтай арга хэмжээ авч, Улаанбаатар хотын Захирагчийн ажлын албаны холбогдох албаныхныг байлцуулан гэрээт аж ахуйн нэгжүүдэд дараах хатуу шаардлагуудыг тавьсан байна:
- Махны нийлүүлэлт, түгээлтийн үйл ажиллагаанд зохион байгуулалтын өндөр хариуцлага гаргаж, цаг алдалгүй, тасралтгүй гүйцэтгэх;
- Иргэдэд чирэгдэл учруулахгүйгээр борлуулалтын цэгүүдийг тогтвортой махаар хангах бэлэн байдлыг хангах;
- Түгээлтийн явцад дахин алдаа дутагдал гаргаж, хариуцлага алдсан тохиолдолд холбогдох хатуу арга хэмжээ авахыг анхааруулах.
Салбарын яам болон хотын захиргаанаас шахалт үзүүлж, хяналтыг чангатгасны үр дүнд махны нийлүүлэлт өнөөдөр хэвийн голдирдолдоо орсон байна. Өнөөдрийн байдлаар Номин, М-Март, Миний дэлгүүр сүлжээний нийт 81 салбарт нөөцийн махыг иж бүрэн, бүрэн гүйцэд хүргэж дуусгажээ. Цаашид эдгээр томоохон сүлжээ дэлгүүрүүдээр дамжуулан иргэдэд нөөцийн махыг ямар нэгэн тасалдалгүйгээр, хэвийн борлуулах нөхцөл бүрэн хангагдсан байна.
