Улаанбаатар хотын иргэдийн хүнсний хэрэгцээг хангах, махны хангамжийг нэмэгдүүлэх зорилгоор нөөцийн махны өргөтгөсөн жижиглэн худалдааг өнөөдрөөс буюу тавдугаар сарын 19-ний өдрөөс албан ёсоор зохион байгуулж эхэллээ. Нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсийн мэдээлснээр, тус тусгай худалдаа нь төвийн зургаан дүүргийн тодорхойлсон цэгүүдэд 12:00-20:00 цагийн хооронд иргэдэд үйлчлэх юм байна.
Иргэд өөрт ойр байрлах дараах зургаан цэгээс үхрийн махыг 15 мянган төгрөгөөр, хонины махыг 13 мянган төгрөгийн тогтоосон үнээр худалдан авах боломжтой:
- Баянгол дүүрэг: “Байгаль эх” цогцолборын талбайд;
- Баянзүрх дүүрэг: Жуковын нэрэмжит талбайд;
- Чингэлтэй дүүрэг: “Алтжин бөмбөгөр” худалдааны төвийн гаднах талбайд;
- Хан-Уул дүүрэг: Төв цэнгэлдэх хүрээлэнгийн орчимд;
- Сонгинохайрхан дүүрэг: “Цамбагарав” худалдааны төвийн гадна талбайд;
- Сүхбаатар дүүрэг: “Хангай” хотхоны гаднах задгай талбайд.
Дээрх өргөтгөсөн задгай худалдаанаас гадна нөөцийн махны хүртээмжийг дэлгүүрүүдээр дамжуулан үргэлжлүүлнэ. Тодруулбал, ирэх лхагва гарагаас эхлэн томоохон сүлжээнүүдээр борлуулж эхлэх бол пүрэв, баасан гарагуудад гэрээ байгуулсан хүнсний дэлгүүрүүдэд дээрх ижил үнээр нийлүүлж, борлуулалтыг тогтворжуулахаар төлөвлөжээ.
