АНУ-ын сансар судлалын НАСА агентлаг хагас зуун жилийн дараа хүн төрөлхтнийг дахин сарны тойрог замд хүргэх зорилготой “Artemis II” нислэгээ гурван сараар хойшлуулж буйгаа зарлалаа. Уг түүхэн үйл явдал ирэх хоёрдугаар сарын 7-нд товлогдоод байсан ч бэлтгэл ажлын явцад гарсан техникийн хэд хэдэн хүндрэлээс үүдэн ийнхүү шийдвэрлэжээ.
Туршилтын явцад илэрсэн гол асуудлуудыг НАСА агентлагийн төлөөлөгч Жаред Айзекман танилцуулахдаа дараах гурван хүчин зүйлийг онцолсон байна:
- Шингэн устөрөгчийн алдагдал: Space Launch System (SLS) пуужингийн түлшний системд шингэн устөрөгч алдагдсан нь нислэгийн аюулгүй байдалд эрсдэл учруулж болзошгүй гэж үзжээ.
- Холбооны тасалдал: Бэлтгэл ажлын үеэр газрын хяналтын төв болон хөлгийн хооронд холбоо тасрах тохиолдол хэд хэдэн удаа гарсан байна.
- Техникийн гэмтэл: Orion сансрын хөлгийн хаалгатай холбоотой гэмтэл илэрсэн нь засварлах зайлшгүй шаардлага үүсгэжээ.
“Гурван жилийн дараа хөөргөх гэж буй SLS пуужингийн хувьд иймэрхүү хүндрэлүүд гарна гэдэгт бид бэлэн байсан” хэмээн Жаред Айзекман мэдэгдэлдээ дурдсан юм.
Арван хоногийн турш үргэлжлэх “Artemis II” нислэгт дөрвөн сансрын нисэгч оролцох бөгөөд тэд сарыг тойроод дэлхийд эргэн ирэх төлөвлөгөөтэй байгаа юм. Энэхүү нислэг нь дараагийн шат буюу “Artemis III” хөтөлбөрийн хүрээнд сансрын нисэгчдийг саран дээр бодитоор буулгахад хамгийн чухал туршилт, бэлтгэл ажил болох юм. Тиймээс НАСА агентлаг ямар нэгэн эрсдэл гаргахгүйн тулд ийнхүү хугацааг хойшлуулж, техникийн бүрэн бүтэн байдлыг хангахаар ажиллаж байна.
