Хөнгөн атлетикийн насанд хүрэгчдийн дэлхийн аварга шалгаруулах тэмцээн есдүгээр сарын 13-нд Японы Токио хотноо эхэлнэ.
20 дахь удаагийн энэ дэлхийн аваргад 200 гаруй орны тамирчид 49 багц медалийн төлөө өрсөлдөх бөгөөд Монгол Улсаас эрэгтэй, эмэгтэй тус бүр хоёр тамирчин марафоны төрөлд шалгараад байна.
Тухайлбал, Монгол Улсын гавьяат тамирчин Бат-Очирын Сэр-Од дэлхийн чансаанд 66-д бичигдэж, дэлхийн аваргад оролцох эрхээ авчээ. Түүний хувьд энэ нь дэлхийн аваргад 12 дахь удаагаа оролцож буй нь түүхэн амжилт юм. Дэлхийн аваргын марафонд ийм олон удаа оролцсон өөр тамирчин байхгүй бөгөөд Сэр-Од 2023 онд Гиннесийн дээд амжилтыг тогтоосон. Тэрээр одоо 44 настай бөгөөд удахгүй болох тэмцээнд шаргуу бэлтгэж байна.
Мөн олон улсын хэмжээний мастер Цэвээнравдангийн Бямбажав дэлхийн чансааны 82-д бичигдэж, Токио хотод оролцох эрхээ авсан. Эмэгтэйчүүдийн марафонд олон улсын хэмжээний мастерууд болох Баярцогтын Мөнхзаяа, Галбадрахын Хишигсайхан нар шалгарчээ. Эмэгтэйчүүдийн марафон есдүгээр сарын 14-нд, эрэгтэйчүүдийн марафон дараагийн өдөр болох юм.
20 дахь удаагийн дэлхийн аварга шалгаруулах тэмцээн албан ёсоор есдүгээр сарын 13-нд 35 км-ийн спортын алхалтын төрөлтэйгээр эхэлнэ.
