2025 оны долоодугаар сарын 2-ны өдөр Төрийн ордны “Их Монгол” танхимд хувцас загвар, үйлдвэрлэлийн салбарын цоо шинэ ирээдүйн тухай хэлэлцэх чухал арга хэмжээ амжилттай болж өндөрлөлөө. “Хувцасны хувьсгал” нэртэй энэхүү стратегийн хэлэлцүүлэг нь Mongolia Fashion Week 2025-ын хүрээнд зохион байгуулагдсан бөгөөд салбарын алсын харааг олон талын оролцоотойгоор тодорхойлсон нь онцлог байв.
Гурван чиглэл, нэг зорилго
Хэлэлцүүлэг нь дараах гурван үндсэн сэдвийн хүрээнд өрнөсөн:
- Өнгөрсөн – Салбарын хөгжлийн түүх, сургамжууд
- Одоо – Одоогийн байдал, боломж ба сорилт
- Ирээдүй – Инноваци, тогтвортой хөгжил, дэлхийн зах зээл дэх Монгол брэнд
Үндэсний өв соёлоо хадгалсан, инновацид суурилсан, байгальд ээлтэй үйлдвэрлэл бүхий “Монгол загвар”-ыг дэлхийн тавцанд гаргах зорилго энэхүү хэлэлцүүлгээр тодорхойлогдлоо.
Оролцогч талууд ба төлөөлөл
Энэ арга хэмжээнд:
- Монгол Улсын Засгийн газрын гишүүн, Соёл, спорт, аялал жуулчлал, залуучуудын сайд Ч.Ундрам
- Ерөнхийлөгчийн Эдийн засгийн бодлогын зөвлөх Б.Даваадалай
- Хүнс, хөдөө аж ахуй, хөнгөн үйлдвэрийн яам, Жижиг, дунд үйлдвэрийн газар
- ШУТИС, мэргэжлийн холбоод, загвар зохион бүтээгчид, оёдлын урлан, түүхий эд нийлүүлэгчид
гэх мэт 400 гаруй төлөөлөл бүхий оролцогч нэгдсэн байна.
Мөн Дархан, Сэлэнгэ, Ховд, Завхан, Өмнөговь зэрэг 10 гаруй аймгаас төлөөлөгчид хүрэлцэн ирж, хөдөө орон нутгийн оёдол, загварын оролцоог нэмэгдүүлсэн нь онцлох ач холбогдолтой.
Төрийн бодлого ба хууль эрх зүй
Хувцас үйлдвэрлэл нь эдийн засгийн боловсруулах үйлдвэрлэлийн 14 дүгээр дэд салбар болон Соёлын бүтээлч үйлдвэрлэлийн тухай хуулийн 7.2.3 дахь хэсэгт “хувцас загварын салбар” гэж тусгайлан тусгагдсан. Энэ нь салбарын хөгжлийг Соёлын яам болон Хөнгөн үйлдвэрийн яам хамтран бодлогын түвшинд дэмжих үндэс суурийг бүрдүүлж байгаа юм.
Алсын хараа ба уялдаа холбоо
Хувцас үйлдвэрлэл ба загвар бол нэг зоосны хоёр тал. Эдгээр салбарын уялдаа холбоог бэхжүүлж, бүтээгдэхүүнээ түүхий эдээс эхлэн брэнд болгон хөгжүүлэх урт хугацааны бодлогыг хэрэгжүүлэхэд хэлэлцүүлэг оролцогчид санал нэгдсэн.
Ингэснээр зөвхөн оёдол, загварын түвшинд бус, түүхий эд бэлтгэл, боловсруулах үйлдвэрлэл, брэндинг, экспортын суурь бүхий нэгдсэн экосистем бүрдүүлэх үндэс тавигдлаа.
