Монгол Улсад анх удаа “Nomadic Fighting Championship” (NFC) нэртэй холимог тулааны спортын тэмцээн 2025 оны 4-р сарын 27-нд “M Bank Arena”-д зохион байгуулагдах гэж байна. Тус тэмцээнийг Монголын тулааны урлагийн холбоо анх удаа зохион байгуулж байгаа бөгөөд дөрвөн төрлийн тулааны урлагийг нэгэн дор нэгтгэсэн анхны эвент болохоороо онцлогтой юм.
Тулааны спортын дөрвөн төрөл нэг тайзан дээр
Тэмцээний хүрээнд нийт есөн тулаан болох бөгөөд оролцогчид дараах спортын төрлүүдээр өрсөлдөнө:
- Холимог тулаан (ММА)
- Кикбокс
- Муай-тай
- Грэпплинг ба Сабмишн
Гол тулаан: М.Нандин-Эрдэнэ vs Танавит Ликит
Үдэшлэгийн гол тулаан нь NFC-ийн анхны кикбоксын аваргын бүсний төлөөх тулаан байх бөгөөд Монголын шилдэг холимог тулаанч, олон улсын хэмжээний мастер М.Нандин-Эрдэнэ Тайландын кикбоксчин Танавит Ликит-тэй тулалдах юм.
Түүнчлэн дэлхийн шилдэг үнэлгээтэй гадаад тулаанчид Монголын шилдгүүдтэй хүч үзэх тул үзэгчдэд бодит тулааны оргил мэдрэмжийг өгөх хүлээлттэй байна.
Тасалбарын үнэ
Эвентэд оролцох тасалбарын үнэ 60,000–3,000,000 төгрөгийн хооронд байна. М.Нандин-Эрдэнэ энэхүү тулаанд зориулан гадаадаас эх орондоо эргэн ирж, тусгай бэлтгэл хийж буй юм.
