Испани тоглогч Антонио “MartinezSa” Мартинес ESL Pro League Season 22 тэмцээний үеэр The MongolZ багийн талаарх арьс өнгийн өнгө аястай үг хэлснийхээ дараа олон нийтэд уучлал хүссэн байна.
Тэрбээр 10-р сарын 7-нд X (хуучнаар Twitter)-д “Миний хэлсэн зүйл бүрэн тохиромжгүй байсан. Энэ үг хэчнээн доромж, шархлуулж болохыг би одоо ойлгож байна” гэж бичжээ.
Маргаан үүсгэсэн үйл явдал
Gentle Mates болон The MongolZ багуудын тоглолтын үеэр MartinezSa камерын бичлэгт “Jackie Chan” гэж хэлсэн нь олонд цацагдаж, арьс өнгөөр ялгаварласан хандлага гэж үзэгдэв. Энэ нь Гонконгийн жүжигчин Жэки Чаны нэрийг ашигласан доромж хэллэг гэж олон киберспорт сонирхогчид шүүмжилсэн юм.
Бичлэг сошиал сүлжээнд хурдацтай тарж, тоглогч болон Gentle Mates багийн нэр хүндэд сөргөөр нөлөөлөв. Тоглолтын дараа The MongolZ баг ялалт байгуулж, Gentle Mates тэмцээнээс хасагдсан билээ.
MartinezSa-ийн уучлал
Gentle Mates баг тэмцээнээс хасагдсаны дараа MartinezSa өөрийн баг, The MongolZ баг болон Counter-Strike 2-ийн олон нийтэд хандан уучлал хүссэн мэдэгдэл гаргасан.
Тэр хэлэхдээ:
“Миний хэлсэн зүйл хүлээн зөвшөөрөхийн аргагүй, хүндэтгэлгүй байсан. Би өөр соёлын хүн тул зарим үг, илэрхийллүүдийн ач холбогдлыг бүрэн ойлгоогүй байж болох ч энэ бол шалтаг биш. Би өөрийгөө боловсруулж, илүү сайн хүн байх үүрэгтэй. Миний хэлсэн зүйл миний итгэл үнэмшил, хүн чанарыг илэрхийлэхгүй. The MongolZ багийн тоглогчид, хамт олон, байгууллага, намайг дэмждэг бүх хүнд уучлалт хүсэж байна. Клубээс гаргах шийдвэрийг би бүрэн хүлээн зөвшөөрнө.”
Хариу үйлдэл ба олон нийтийн байр суурь
The MongolZ баг албан ёсоор “гомдол гаргахгүй” гэж мэдэгдсэн ч олон фен MartinezSa-ийн уучлалыг хиймэл, эсвэл зохиомол мэт хүлээн авч, зарим нь “AI бичсэн юм биш үү” гэж хошигнож байв. Харин бусад нь түүнийг алдаагаа хүлээн зөвшөөрч, анхны алхмаа хийсэнд талархаж, үг болон үйлдэл нь цаашид нийцэх ёстой гэж үзсэн байна.
Гэсэн хэдий ч хэсэг фенүүд энэ асуудлыг “хэт дөвийлгөсөн” гэж үзэж, MartinezSa-г цаашдаа анхааралтай, хариуцлагатай байхыг зөвлөжээ. Зарим киберспорт сонирхогчид trash talk буюу сөрөг үг хэллэгийг өрсөлдөөний нэг хэсэг гэж үздэг ч энэ тохиолдолд тэр хязгаарыг давсан хэмээн дүгнэсэн байна.
Gentle Mates клуб мөн X-д мэдэгдэл гаргаж, түүний хэлсэн үгсийг “хүлээн зөвшөөрөхийн аргагүй, багийн үнэт зүйлстэй нийцэхгүй” гэж тодорхойлсон. Гэхдээ байгууллага түүнийг ямар шийтгэл хүлээх талаар тодорхой мэдээлэл өгөөгүй байна. ESL байгууллага мөн энэ талаар албан ёсны тайлбар хийгээгүй байгаа ч ёс зүйн дүрэм зөрчсөн гэж үзэж буй аж.
