Засгийн газрын шийдвэрийн дагуу энэ жил улсын хэмжээнд 240 мянган айл өрхөд нийт 81 тэрбум төгрөгийн цахилгааны хөнгөлөлт үзүүлэх бөгөөд энэхүү хөнгөлөлт ирэх сарын 1-нээс буюу маргаашаас хэрэгжиж эхэлнэ.
2025 оны хоёрдугаар сарын 6-ны өдрийн Засгийн газрын хуралдаанаар цахилгааны шөнийн хөнгөлөлтийн журамд шинэчилсэн өөрчлөлт оруулсан байна. Өмнө нь оройны 21:00 цагаас өглөөний 06:00 цаг хүртэл хүчинтэй байсан хөнгөлөлтийн хугацааг өглөөний 09:00 цаг хүртэл сунгасан нь иргэдийн хэрэглээнд илүү таатай нөхцөл бүрдүүлж байгаа юм.
Хэрэглээний дээд хязгаар нэмэгдэв
Шинэ журмын дагуу хэрэглээний дээд хэмжээг хоёр дахин өсгөсөн байна. Үүнд:
- 220 вольтын хүчдэлийн түвшинтэй айлуудад — сар бүр 1500 кВт.цаг хүртэл хөнгөлөлт үзүүлнэ.
- 380 вольтын хүчдэлийн түвшинтэй айлуудад — сар бүр 3000 кВт.цаг хүртэл хөнгөлөлт хамаарна.
Цахилгааны шөнийн хөнгөлөлтийн энэхүү арга хэмжээ нь эрчим хүчний хэрэглээг жигдлэх, шөнийн ачааллыг нэмэгдүүлэх замаар эрчим хүчний системийн үр ашгийг дээшлүүлэх зорилготой юм.
