Урин дулааны улирал ирснээр нийслэлчүүдийн дунд цахилгаан дугуй, скүүтэрийн хэрэглээ эрс нэмэгдэж, замын хөдөлгөөнд хоёр дугуйт тээврийн хэрэгслээр оролцох тохиолдол нэмэгдсэн. Үүний улмаас сүүлийн хоёр жилийн хугацаанд энэ төрлийн осол, гэмтлийн 530 гаруй тохиолдол бүртгэгджээ.
Энэхүү нөхцөл байдалтай уялдуулан Имарт буюу Скай Хайпермаркет ХХК нь хүүхдийг зам тээврийн ослоос урьдчилан сэргийлэх, тэдний аюулгүй байдлыг хангах зорилгоор Сонгинохайрхан дүүргийн Тээврийн Цагдаагийн хэлтэстэй хамтран 153-р сургуулийн сурагчдад хамгаалалтын дуулга (малгай) гардууллаа.
Арга хэмжээний хүрээнд:
- Цагдаагийн ахлах дэслэгч У.Мөнх-Ундрал хүүхдүүдэд хамгаалалтын хэрэгслийн хэрэглээ, замын хөдөлгөөний үеийн эрсдэл, ослоос хэрхэн сэргийлэх талаарх мэдлэг мэдээлэл өгсөн.
- Сургуулийн сурагчдын дунд хөдөлгөөний аюулгүй байдлын талаарх ухамсрыг нэмэгдүүлэх сургалт, ойлголцлыг өрнүүлжээ.
Скай Хайпермаркет ХХК нь 2018 оноос эхлэн “Замын хөдөлгөөн — Хүүхэд” аяныг Тээврийн Цагдаагийн албатай хамтран зохион байгуулсаар ирсэн. Энэ хугацаанд нийт 5000 ширхэг аюулгүйн бүсний тохируулагчийг бэлэглэж, хүүхдүүдийн амь нас, аюулгүй байдалд чиглэсэн олон нийтийн хандлагыг нэмэгдүүлсэн.
Хамгаалалтын дуулганы ач холбогдол:
- Осол гарсан тохиолдолд толгойн гэмтэл авах эрсдэлийг 85% хүртэл бууруулдаг.
- Ялангуяа скүүтэр, дугуй унаж яваа хүүхдүүдийн дунд энэ төрлийн осол нэмэгдэж буй тул хамгаалалтын дуулга зайлшгүй шаардлагатай гэж үздэг.
Уриалга:
Замын хөдөлгөөнд оролцохдоо хамгаалалтын малгайгаа тогтмол өмсөж хэвшихийг албаныхан болон аж ахуйн нэгжүүд иргэд, хүүхдүүдэд уриалж байна.
