Хятадын технологийн аварга Huawei 2025 оны хоёрдугаар улиралд ухаалаг цагны дэлхийн зах зээл дээр нийлүүлэлтийн хэмжээгээр гол өрсөлдөгч Apple-ийг гүйцэж, анх удаа тэргүүлэх байр суурь эзэллээ. Mongolnews24.com-ийн мэдээлснээр, энэ тухай Counterpoint Research-ийн шинэ тайланд дурдсан байна.
Ухаалаг цагны зах зээл 2024 оны эхний улирлын уналтаас хойш 8%-ийн өсөлт үзүүлсэн нь энэ амжилтын суурь болжээ. Хятадын зах зээл дээрх эрэлт эрс нэмэгдсэн нь сэргэлтийн гол хөдөлгөгч хүч болсон байна.
Тайланд дурдсанаар, Huawei нийлүүлэлтээ 52%-иар өсгөж, дэлхийн ухаалаг цагны зах зээлийн 21%-ийг эзэлжээ. Зөвхөн Huawei ч биш, бусад Хятадын брэндүүдийн өсөлт ч том нөлөө үзүүлсэн байна. Xiaomi нийлүүлэлтээ 38%-иар, харин Imoo 21%-иар өсгөсөн нь Хятадыг дэлхийн нийлүүлэлтийн гол хөдөлгөгч болгожээ.
Энэ хооронд Apple болон Samsung дэлхий даяар нийлүүлэлтээ тус бүр 3%-иар бууруулсан байна. Гэсэн ч Apple дээд зэрэглэлийн (премиум) ухаалаг цагны сегментэд ноёрхлоо хадгалж байгаа аж.
Counterpoint Research-ийн шинжээчид 2025 онд ухаалаг цагны зах зээл өсөлтөө үргэлжлүүлнэ гэж таамаглаж байгаа бөгөөд жилийн дундаж өсөлт 7% хүрнэ гэж тооцоолжээ.
