2026 оны Дэлхийн аварга шалгаруулах тэмцээний (ДАШТ) ялагчид хөлбөмбөгийн түүхэнд анх удаа нэгэн өвөрмөц шагналыг хүртэхээр болжээ. Энэ талаар Олон улсын хөлбөмбөгийн холбооны (ФИФА) хэвлэлийн албанаас мэдээллээ.
ФИФА-гийн ивээл дор зохион байгуулагддаг тэмцээний түүхэнд анх удаа аваргын бөгж гардуулах гэж байна. Энэхүү уламжлал нь Америкийн спортын лигүүдэд түгээмэл байдаг бөгөөд 2026 оны ДАШТ нь АНУ, Канад, Мексик улсуудад зохион байгуулагдаж байгаа тул ийм шийдвэр гаргажээ.
Бөгжний тухай сонирхолтой баримтууд
- Хязгаарлагдмал тоо ширхэг: Бөгж бүрийг тэмцээн зохиогдож буй 2026 оныг бэлгэдэн 2026 ширхэгээр, хувийн дугаартайгаар цөөн хувь үйлдвэрлэнэ. Үүнээс 30 бөгжийг аварга багийн тамирчид болон дасгалжуулагчдад гардуулах бөгөөд үлдсэн 1996 ширхэгийг ФИФА-гийн албан ёсны лицензтэй бүтээгдэхүүн болгон дэлхий даяар худалдаалах аж.
- Загвар дизайн: Бөгжний нэг талд ДАШТ-ий алтан цомыг дүрслэх бол нөгөө талд нь аварга багийн логог байрлуулна. Бөгж бүр өөрийн гэсэн дугаартай, тухайн хүний хурууны хэмжээгээр тааруулсан байх ба албан ёсны баталгааны гэрчилгээтэй байна.
Тоглолт дууссаны дараа ялагч багийн ахлагч болон ерөнхий дасгалжуулагчид баяраа тэмдэглэхэд зориулж түр бөгж гардуулна. Үүний дараа 30 ширхэг аваргын бөгжийг захиалгаар тусгайлан хийж, бэлэн болмогц албан ёсоор гардуулах ажээ.
2026 оны ДАШТ-ий шигшээ тоглолтод Испани болон Аргентины шигшээ багууд өрсөлдөх бөгөөд тоглолт 7-р сарын 19-ний өдөр Нью-Жерсигийн цэнгэлдэх хүрээлэнд болно.
