2026 он гарсаар улсын хэмжээнд мөс цөмөрсөн зургаан удаагийн дуудлага Онцгой байдлын газарт бүртгэгдээд байна. Үүнээс Хөвсгөл аймагт дөрөв, Дархан-Уул аймагт нэг, нийслэлийн Багануур дүүрэгт нэг тохиолдол гарчээ. Иргэд цаг хожих, зам товчлох зорилгоор баталгаагүй замаар буюу гол, нуурын мөсөн дээгүүр тээврийн хэрэгсэлтэй зорчсоноос болж автомашинтайгаа живэх, осолдох эрсдэл гарсаар байгааг албаныхан онцгойлон анхааруулж байна.
Хэдийгээр ихэнх гол мөрний мөсний зузаан өмнөх арав хоногоос нэмэгдсэн ч мөсний даац хүн, мал, машин явахад хангалттай хэмжээнд хүрч бэхжээгүй, зарим хэсэгт харз гүйх үзэгдэл ажиглагдаж байгаа юм.
Гол мөрөн, нууруудын мөсний өнөөгийн байдал:
- Хөвсгөл нуур болон голууд: Нуурын мөс 50-65 см зузаантай байгаа нь 2025 оны мөн үеийнхээс 10-15 см ахиу байна. Дэлгэрмөрөн, Эг, Үүр, Бүгсий, Шишхэд голууд 25-100 см зузаан мөсөн бүрхүүлтэй байгаа ч Эг голын дагууд харз гүйх үзэгдэл ажиглагджээ.
- Хангай нурууны голууд: Идэр, Хануй, Чулуут зэрэг голуудын мөс 20-130 см зузаан тогтсон байна. Чулуут гол Өндөр-Улаан сум орчимд 50 см зузаан мөстэй байгаа бол Хануй гол Эрдэнэмандал орчимд өнгөрсөн оны мөн үеэс 30 см нимгэн байна.
- Хэнтий нурууны голууд: Туул, Хараа, Ерөө, Тэрэлж голуудын мөс 40-105 см зузаантай байна. Хараа голын эх болон Туул голын адгаар мөс 5-10 см нимгэн байгаа бол Сэлбэ, Улиастай голууд ёроолдоо хүртэл хөлдсөн байна.
- Сэлэнгэ мөрөн, Орхон гол: Мөсний зузаан 45-90 см хүрсэн боловч Сэлэнгэ мөрний дагууд харз гүйх үзэгдэл зонхилж байгааг анхааруулж байна.
- Зүүн бүс ба нуурууд: Хэрлэн, Онон, Улз, Халх голууд 65-100 см зузаан мөстэй байгаа нь өнгөрсөн оныхоос 5-25 см ахиу байна. Өгий, Тэрхийн Цагаан, Буйр, Хөх нууруудын мөс 65-95 см зузаан бүрхүүлтэй байна.
Иргэд та бүхэн гол мөрөн, нуурын мөсний зузаан жигд биш байгааг анхаарч, авто тээвэр хийхгүй байх, мал туухдаа сонор сэрэмжтэй байхыг зөвлөж байна.
