Францын Ерөнхийлөгч Эммануэл Макрон өчигдөр мэдэгдэхдээ, Украины дайны галыг зогсоох тохиролцоонд хүрсний дараа аюулгүй байдлыг хангах зорилгоор 26 улс Украинд цэргээ илгээхээр албан ёсоор амласан гэжээ.
Энэхүү шийдвэрийг “Хүсэл сонирхлын эвсэл” хэмээн нэрлэгдсэн 35 улсын дээд хэмжээний уулзалтын үр дүнд зарласан байна. Макрон мөн АНУ-ын засаг захиргаа ойрын өдрүүдэд өөрийн оролцоог эцэслэн баталгаажуулна гэж онцолжээ.
АНУ-ын Ерөнхийлөгч Дональд Трамп саяхан Украины аюулгүй байдлыг хангахад агаарын хүчээр дэмжлэг үзүүлж болзошгүйг илэрхийлсэн бол Украины Ерөнхийлөгч Володимир Зеленский АНУ-тай “Украины тэнгэрийг дээд зэргээр хамгаалах” талаар хэлэлцсэнээ мэдэгджээ.
Гэсэн хэдий ч дайныг зогсоох асуудал одоогоор тодорхойгүй хэвээр байна. Трамп өнгөрсөн сард ОХУ-ын Ерөнхийлөгч Владимир Путинтэй Аляскад уулзсан ч ахиц дэвшил гараагүй байна. Пүрэв гарагт Финландын Ерөнхийлөгч Александер Стуббтай утсаар ярихдаа Трамп Оросын газрын тос, байгалийн хийн худалдан авалтыг бүрэн зогсоохыг Европын Холбоонд уриалжээ.
Европын Холбооны 27 гишүүн орон 2027 оны эцэс гэхэд Оросын байгалийн хий, газрын тосны импортыг бүрэн зогсоох зорилт тавьжээ. Гэсэн ч сүүлийн нэг жилийн хугацаанд тус холбоо Оросоос 1.1 тэрбум еврогийн эрчим хүчний бүтээгдэхүүн худалдан авсан гэж Цагаан ордны эх сурвалж мэдээлсэн байна.
Трампын дайныг зогсоох хүчин чармайлт мухардмал байгаа энэ үед Оросын тал Украины нутаг дэвсгэрт цэргээ нэмж илгээсээр байна. Москвагийн эрх баригчид гал зогсоох нөхцөл болгон Өрнөдийн цэрэг Украины нутагт байрлах ёсгүй гэсэн хатуу шаардлага тавьж байна.
Пүрэв гарагт Украины засгийн газрын төлөөлөгчид АНУ-ын Ерөнхийлөгчийн тусгай элч Стив Виткоффтой уулзахаар Парист очжээ. Энэ долоо хоногийн эхээр Путин гал зогсоох хэлэлцээг Москвад зохион байгуулж, Зеленскийг оролцохыг урьсан ч Киевийн тал үүнийг “хүлээн авах боломжгүй” хэмээн татгалзаж, Оросын тал дайныг зогсоох хүсэлгүй байгаагийн илрэл гэж шүүмжилжээ.
