Финландын Тампере хотод хархнаас үүдэлтэй томоохон хэмжээний цахилгааны саатал гарч, Хярмяля болон Рантаперккиё дүүргийн “Tampere Energia” компанийн 5500 орчим хэрэглэгч гэрэл цахилгаангүй болжээ.
Aamulehti сонинд мэдээлснээр, мэрэгчид ил задгай тоног төхөөрөмж рүү авирч, кабелийн сүлжээг гэмтээсэн байна. “Tampere Energia” компанийн үйл ажиллагаа хариуцсан захирал Йоуни Ванханаркаус уг ослыг баталсан бөгөөд энэ нь тухайн байгууламж дээр гарч буй хоёр дахь тохиолдол болохыг тэмдэглэв. Энэ өвөл өмнө нь ижил төрлийн саатал гарахад мэргэжилтнүүд үхсэн харх олж байсан бол энэ удаад ч мөн богино холболтын улмаас амиа алдсан мэрэгчид олджээ.
Ванханаркаус хэлэхдээ: “Өвөл яг энэ газарт саатал гарсан. Тэр үед харх олдсон юм. Бид засах арга хэмжээ авсан боловч хангалтгүй байлаа. Одоо өөр шийдэл бодох хэрэгтэй байна” гэжээ.
Захирлын онцолсноор, тэрээр салбартаа 20 жил ажиллахдаа ийм тохиолдолтой таарч байгаагүй аж. Шувууд агаарын шугамд саатал учруулах нь бий ч амьтан кабелийн сүлжээ гэмтээж байсан тохиолдол түүнд мэдэгдээгүй байна.
Хархнууд тоног төхөөрөмжийн ойролцоо бетонон хайрцаг дор үүрлэсэн байжээ. Эхний ослын дараа мэргэжилтнүүд тухайн хэсгийг хайргаар дүүргэж, хархны хор тавьсан боловч ямар ч үр дүн өгөөгүй байна.
