Францын “Vitagermine” үйлдвэрийн “Babybio” брэндийн Optima 1 төрлийн сүүн тэжээлээс “Bacillus cereus” хэмээх нянгийн хор илэрсэн байж болзошгүй гэх үндэслэлээр АНУ-ын Хүнс, эмийн агентлагаас (FDA) анхааруулга гаргалаа. Үүнтэй холбогдуулан олон улсын зах зээл дээрх тодорхой цувралын бүтээгдэхүүнүүдийг яаралтай буцаан татаж байна.
Хэдийгээр одоогоор уг бүтээгдэхүүнээс шалтгаалсан хордлогын тохиолдол бүртгэгдээгүй байгаа ч үйлдвэрлэгч компанийн шийдвэрийн дагуу Монгол Улсад борлуулагдаж буй дараах хоёр цувралыг сайн дурын үндсэн дээр худалдаанаас гаргаж эхэлжээ.
Татан авалтад багтсан бүтээгдэхүүний жагсаалт:
- BABYBIO Optima 1 (800 гр): Цувралын дугаар 894408, дуусах хугацаа 2027.07.09.
- BABYBIO Optima 1 (800 гр): Цувралын дугаар 900035, дуусах хугацаа 2027.08.12.
- BABYBIO Optima 1 (400 гр): Цувралын дугаар 900932, дуусах хугацаа 2027.08.18.
Эцэг эхчүүд та бүхэн худалдан авсан сүүн тэжээлийнхээ цувралын дугаарыг нягталж, дээрх тоонууд таарч байвал хэрэглэхээ нэн даруй зогсоох шаардлагатай. Хэрэв таны хүүхэд уг тэжээлийг хэрэглэсний дараа ямар нэгэн зовиур илэрвэл эсвэл мэргэжлийн зөвлөгөө авахыг хүсвэл ХӨСҮТ-ийн 100 дугаарын утсанд хандана уу.
