Олон хүн урт наслахын нууцыг зөвхөн хатуу хоолны дэглэм, өдөр бүрийн дасгал хөдөлгөөнтэй холбож ойлгодог. Гэвч мэргэжилтнүүдийн үзэж буйгаар, бие болон сэтгэлзүйн эрүүл мэндэд хүчтэй нөлөөлдөг өөр нэг энгийн дадал бий. Энэ нь тогтмол, чанартай унтах юм.
Шөнийн бүрэн амралт нь биеийг сэргээж, тархины ажиллагааг дэмжиж, дархлааг бэхжүүлдэг. Мөн зүрх судасны систем, дааврын тэнцвэр, мэдрэлийн тогтолцоонд чухал үүрэгтэй гэж эмч нар тайлбарлаж байна.
Унтаж байх үед бие зөвхөн амарч байдаггүй. Энэ хугацаанд эд эс нөхөн төлжиж, бодисын солилцоо тогтворжиж, дархлааны хамгаалалт идэвхждэг. Хангалттай унтдаг хүмүүс даралт, бодисын солилцооны алдагдал, архаг ядаргаатай бага тулгардаг гэж мэргэжилтнүүд тэмдэглэжээ.
Дутуу нойр олон эрхтэнд сөргөөр нөлөөлнө
Судалгаагаар байнгын нойр дутуу байх нь биеийн бараг бүх системд сөрөг нөлөөтэй. Энэ нь зүрх судасны өвчин, хоёрдугаар хэлбэрийн чихрийн шижин, таргалалт болон ой санамж, анхаарал төвлөрөл буурах эрсдэлийг нэмэгдүүлж болзошгүй.
Шөнө тархи өдрийн турш авсан мэдээллийг боловсруулж, ой санамжийг бэхжүүлж, шинэ мэдрэлийн холбоосууд үүсгэдэг. Харин нойр дутуу үед хүн төвлөрөх, шийдвэр гаргах, шинэ мэдээлэл тогтоохдоо хүндрэлтэй болдог.
Мөн нойр нь сэтгэл санаанд шууд нөлөөлдөг. Чанартай амралт нь стрессийг бууруулж, түгшүүр, сэтгэл гутралын эрсдэлийг багасгахад тусалдаг байна.
Насанд хүрсэн ихэнх хүнд өдөрт 7-9 цаг унтахыг зөвлөдөг. Гэхдээ зөвхөн хугацаа бус, тогтмол байдал чухал. Амралтын өдөр ч гэсэн ойролцоо цагт унтаж, сэрэх нь биеийн хэмнэлийг тогтвортой байлгахад тустай.
Унтахын өмнө утас, компьютер, зурагтаас хол байх, орой хүнд хоол идэхгүй байх, кофеин хэтрүүлэхгүй байх нь нойрны чанарыг сайжруулна. Эрүүл амьдралын хэв маягт хооллолт, хөдөлгөөн чухал хэвээр ч урт хугацаанд сайн унтах дадал нь биеийг хамгаалах хамгийн энгийн бөгөөд хүчтэй аргуудын нэг юм.
