Карибын тэнгис дэх Литл-Сент-Жеймс арал буюу дуулиант санхүүч Жеффри Эпштейний эзэмшиж байсан газар руу зөвшөөрөлгүй нэвтрэхийг оролдох хүмүүсийн цуваа тасрахгүй байна. Bloomberg агентлагийн мэдээлснээр, арлын шинэ эзэн урилгагүй зочдыг хүчээр тогтоон барихад хүрч байгаа аж.
Тус арал руу нэвтрэхийг оролдогчдын зарим нь Эпштейнийг одоо хүртэл амьд гэдэгт итгэдэг бол зарим нь “мангасуудтай тэмцэх” зорилготой байдаг гэнэ. Арлын шинэ эзэн, тэрбумтан Стивен Декоффын ажилтнууд зарим тохиолдолд нөхцөл байдлыг “өөрсдийн гараар” шийдвэрлэх болсон байна.
“Саяхан арал дээр ирсэн нэгэн зочныг нүцгэлж, гар хөлийг нь хүлсэн тохиолдол гарсан бол өөр нэг хүнийг цагдаа нарын байлцаатайгаар скотчоор хүлж, зодсон байх магадлалтай байна” хэмээн Bloomberg мэдээлэлдээ дурджээ.
Энэхүү идэвхжил нь АНУ-ын Хууль зүйн яам хоёрдугаар сарын 15-нд Эпштейний хэргийн материалуудыг нийтэлж дуусгасантай холбоотой байж болох юм. Ерөнхий прокурорын мэдээлснээр, мөрдөн байцаалтын баримт бичигт 300 орчим алдартны нэр дурдагджээ. Тэдний дунд Дональд Трамп, Обама болон Клинтоны гэр бүлүүд, Билл Гейтс, Илон Маск, Курт Кобейн, Ким Кардашьян нарын нэрс багтсан байна.
Хууль зүйн яамны зүгээс эдгээр нэрс жагсаалтад дурдагдсан нь тухайн хүмүүсийг гэм буруутайд тооцож байгаа эсвэл хууль бус үйлдэл хийснийг нь нотолж буй хэрэг биш гэдгийг онцгойлон анхааруулсан юм.
