Энэтхэгийн засаг захиргаа гадаад хамтын ажиллагааныхаа хүрээнд хэд хэдэн улсад олгох төсвийн хэмжээгээ шинэчлэн баталсны дотор Монгол Улсад зориулсан санхүүжилт онцгойлон нэмэгджээ. Тодруулбал, Энэтхэгийн талаас манай улсад зарцуулах төсвийг 25 сая рупий буюу ойролцоогоор 971.6 сая төгрөг болгож ахиулсан байна. Энэ нь өнгөрсөн жилийн 5 сая рупийн санхүүжилттэй харьцуулахад тав дахин өссөн үзүүлэлт бөгөөд хоёр орны харилцаа шинэ шатанд гарсныг илтгэж байна.
Шинжээчдийн үзэж буйгаар Энэтхэг улс Монголыг коксжих нүүрсний стратегийн чухал нийлүүлэгч гэж харж байгаа төдийгүй технологийн салбарт гүнзгий хамтран ажиллах сонирхолтой байгаа юм. Энэхүү түншлэлийн хүрээнд ОХУ-ын нутаг дэвсгэрээр дамжин өнгөрөх “Монгол-Энэтхэгийн түүхий эдийн гүүр” хэмээх тээврийн коридор байгуулах боломжийг ч эрэлхийлж байна.
Хамтын ажиллагааны гол чиглэлүүд:
Хоёр орны Засгийн газар хоорондын 2025 оны 10 дугаар сарын уулзалтаар нийт 10 салбарыг хамарсан харилцан ойлголцлын санамж бичигт гарын үсэг зурсан байдаг. Үүнд:
- Уул уурхай: Коксжих нүүрс болон зэсийн нийлүүлэлт, геологийн салбарын түншлэл.
- Аж үйлдвэр: Гангийн үйлдвэрлэл болон дэвшилтэт технологийн салбарын хамтын ажиллагаа.
- Соёл, дижитал шилжилт: Соёлын солилцоог идэвхжүүлж, цахим технологийн туршлага хуваалцах.
Геологи, ашигт малтмалын салбарт байгуулсан хэлэлцээр нь ирээдүйд Монгол Улсын экспортын гол түшиц цэг болно гэж талууд итгэл дүүрэн байгаа бөгөөд төсвийн энэхүү өсөлт нь дээрх ажлуудыг бодит ажил хэрэг болгоход чухал түлхэц болох юм.
