Эрүүл мэндийн салбарын ажилчдын цалинг нэмэгдүүлэх асуудлаар Монголын эрүүл мэндийн ажилчдын үйлдвэрчний эвлэлийн холбоо, Эрүүл мэндийн яам болон хувийн хэвшлийн эрүүл мэндийн байгууллагуудын нэгдсэн холбоо хамтран уулзалт зохион байгуулсан байна. Гэвч хэлэлцээ тодорхой үр дүнд хүрэлгүй өндөрлөжээ.
Эрүүл мэндийн ажилчид үндсэн цалинг 3.5 сая төгрөгт хүргэх шаардлагаа хэвээр баримталж байгаа бөгөөд хэлэлцээ үр дүнгүй болсон тул ажил хаялт зарлах шийдвэр гаргаад байна.
Ажил хаялт зарлахаар шийдвэрлэсэн 14 байгууллага
Хэлэлцээний дараа дараах 14 эмнэлэг болон эрүүл мэндийн байгууллага нийт ажилтны хурлаа хийж, ажил хаялтад нэгдэхээ илэрхийлжээ:
- Ховд аймгийн бүсийн оношилгоо эмчилгээний төв
- Дорноговь аймгийн нэгдсэн эмнэлэг
- Завхан аймгийн нэгдсэн эмнэлэг
- Багануур дүүргийн эрүүл мэндийн төв
- Хөвсгөл аймгийн нэгдсэн эмнэлэг
- Уламжлалт анагаах ухаан, технологийн хүрээлэн
- Сонгинохайрхан дүүргийн эрүүл мэндийн төв
- Зоонозын өвчин судлалын үндэсний төв
- Дархан-Уул аймгийн Шарын гол, Хонгор, Орхон сумдын эрүүл мэндийн төв
- Баянхонгор аймгийн нэгдсэн эмнэлэг
- Баянзүрх дүүргийн эрүүл мэндийн төв
- Сонгинохайрхан дүүргийн өрхийн эрүүл мэндийн төвүүд
- Нийгмийн эрүүл мэндийн үндэсний төв
- Хөвсгөл аймгийн зоонозын төв
Эмч нарын байр суурь
Эмч, сувилагчид “Ажил хаялтын үед ямар нэгэн эрсдэл гарвал төр, засаг хариуцлагыг нь бүрэн хүлээх ёстой” хэмээн мэдэгдсэн байна. Тэдний хэлснээр цалингийн өсөлт нь зөвхөн ажилчдын амьжиргаанд төдийгүй эмнэлгийн үйлчилгээний чанарт ч эерэг нөлөө үзүүлэх чухал алхам юм.
Одоогийн байдлаар ажил хаялтад нэгдэх байгууллагууд бэлтгэл ажлаа хангаж байгаа бөгөөд ҮЭ-ийн холбооноос нөхцөл байдалд хяналт тавьж, шаардлагыг биелүүлэх хүртэл тэмцлээ үргэлжлүүлэхээ мэдэгджээ.
Эх сурвалж: Монголын эрүүл мэндийн ажилчдын ҮЭ-ийн холбоо
