Испани болон Аргентины шигшээ багуудын хооронд болох 2026 оны Дэлхийн аварга шалгаруулах тэмцээний шигшээ тоглолтын өмнө Каталоны “Барселона” клубийн хэвлэлийн алба Лионель Месси, Ламин Ямаль нарын алдартай зургийг санууллаа. Зурганд Лионель Месси нялх Ламин Ямалийг ваннд угааж байгаа бөгөөд тэд хоёул “Барселона” клубийн академийн төгсөгчид юм.
“Барселона” клуб уг зургийг “шидэт зураг” хэмээх тайлбартай цахим хуудсандаа нийтэлжээ.
Түүхэн зургийн учир шалтгаан
2007 онд Испанийн “Diario Sport” хэвлэл “Барселона” клубийн тухайн үеийн ивээн тэтгэгч ЮНИСЕФ (UNICEF)-тэй хамтран хөгжөөн дэмжигчдийн дунд нэгэн сугалаа зохион байгуулжээ. Сугалаанд ялсан гэр бүлийн хүүхдийг “Барселона”-гийн ододтой хамт хуанлийн зураг авалтад оруулахаар амласан байна.
Уг сугалаанд Африкаас цагаачлан ирсэн гэр бүл болон тэдний зургаан сартай хүү Ламин Ямаль тохиолдлоор хожжээ. Тэд “Камп Ноу” цэнгэлдэх хүрээлэнд ирж, тухайн үед дөнгөж гялалзаж эхэлж байсан залуу од Лионель Месситэй зургаа татуулах боломж олдсон нь энэ байв.
Хоёр арваны дараах тулаан
Эдүгээ бараг хорин жилийн дараа эдгээр хоёр тоглогчийн эсрэгцэл 2026 оны ДАШТ-ий шигшээ тоглолтыг чимэх гэж байна.
Үүний талаар Ламин Ямаль хэлэхдээ: “Би ч бага зэрэг өслөө, Лео ч мөн адил. Финалиссима (Өмнөд Америк болон Европын шилдэг шигшээ багуудын тоглолт) болоогүй тул түүнтэй ДАШТ-ий шигшээ тоглолтод уулзаж өрсөлдөнө гэж найдаж байна” хэмээн ярьжээ.
Испанийн шигшээ баг хагас шигшээд Францыг 2:0-ээр хожиж шигшээд үлдсэн бөгөөд үүнээс өмнө плей-оффт Бельги (2:1), Португал (1:0), Австри (3:0) багуудыг хожсон юм. Испани – Аргентины шийдвэрлэх тоглолт энэ ням гарагт буюу 7-р сарын 19-нд “МетЛайф” цэнгэлдэх хүрээлэнд болно.
