Монголын боловсрол, шинжлэх ухааны үйлдвэрчний эвлэлийн холбоо (МБШУҮЭХ) болон Боловсролын яам хооронд байгуулсан нэмэлт хэлэлцээрийн үр дүнд багш нар ажил хаялтаа зогсоож, энэ лхагва гарагаас хичээл хэвийн үргэлжлэх боллоо.
Ажил хаялт 13 хоног үргэлжилсний эцэст талууд багш нарын цалин нэмэх, нөхөн олговор олгох зэрэг чухал асуудлуудаар тохиролцоонд хүрчээ.
Цалин нэмэх тохиролцоо:
- Багш нарын үндсэн цалин 2026 оны 11-р сарын 1-нээс 50 хувиар нэмэгдэж, 2.8 сая төгрөгт хүрнэ.
- Цаашид цалинг 3.5 сая төгрөгт хүргэх зорилгоор талууд хамтран ажиллахаар боллоо.
- Ажил хаялтад оролцсон багш нарт нөхөн олговрыг бүрэн олгоно.
МБШУҮЭХ-ны дарга З.Цогтгэрэл хэлэхдээ:
“Улс орон даяар боловсролын 720 байгууллагын 40 гаруй мянган гишүүн ажил хаялт зохион байгууллаа. Ажлын 13 хоногийн турш эв нэгдэлтэй байсан бүх багш нартаа болон биднийг ойлгож, дэмжсэн эцэг эх, сурагчиддаа чин сэтгэлээсээ талархаж байна. Хэлэлцээрийн үр дүнд багш нарын цалинг 2026 онд 2.8 сая төгрөгт хүргэхээр боллоо. Энэ бол багш нарын олон жил хүлээсэн, бодит ахиц гаргасан амжилт юм.”
Ийнхүү хэлэлцээр баталгаажсанаар сургалт, хүмүүжлийн үйл ажиллагааг энэ сарын 5-наас эхлэн хэвийн горимд шилжүүлэх бөгөөд сургууль, цэцэрлэгүүд хичээлдээ бэлтгэж эхэлжээ.
