“Эрдэнэс Тавантолгой” ХК-ийн гүйцэтгэх захирал асан Б.Ганхуягийг энэ долоо хоногийн сүүлчээр суллахаар болсон талаар эх сурвалж мэдээлж байна. Тэрбээр нүүрсний хэргээр ял эдэлж байсан бөгөөд одоогоор “Тахир соёот”-д талбайн туслах ажил хийж байгаа юм.
Өмнө нь уг хэрэгт холбогдсон Т.Аюурсайхан 2.6 жилийн ял эдлээд 2026.02.28-ны өдөр суллагдсан. Харин Б.Ганхуягийн хувьд 3.9 жилийн ял авсан бөгөөд суллагдах хугацаа ойртсон талаар Хууль зүй, дотоод хэргийн сайд Б.Энхбаяр мэдэгдэж байсан.
Б.Ганхуягт анхан шатны шүүхээс 2024.01.31-нд 5 жил 9 сарын хорих ял оноосон ч давж заалдах шатанд хэргийг дахин хэлэлцэж, 2024.09.12-нд ялыг 3 жил 9 сар болгон бууруулсан байдаг. Ийнхүү түүнийг энэ долоо хоногт суллах шийдвэр хэрэгжихээр байна.
