Америкийн дуучин Бритни Спирс гэр бүлийн шинэ маргааны төвд оржээ.
Түүний хөвгүүд болох 20 настай Шон Престон, 19 настай Жейден нар Парис дахь Загварын долоо хоногийн үеэр анх удаа загварын тайзнаа гарч, дебютээ хийх үеэр нь ээжийгээ ирж дэмжсэнгүй хэмээн гомдсон байна. Эх сурвалжуудын мэдээлснээр хөвгүүд Бритнийг энэ чухал өдөр дэргэд нь байхыг урьдчилан хүссэн боловч дуучин Лос-Анжелест үлджээ. Хожим нь тэрээр нисэхээс айдаг гэж шалтгаанаа тайлбарласан ч энэ нь хөвгүүдэд үнэмшилгүй санагдсан байна.
Гэр бүлийн ойрын эх сурвалж “RadarOnline” хэвлэлд “Тэд ээжийгээ ирж дэмжих нь өөрсдийнх нь хувьд ямар чухал болохыг хэд хэдэн удаа ойлгуулсан” гэж ярьжээ.
Эх сурвалжуудын хэлснээр, Шон, Жейден нар ээжийнхээ энэхүү тайлбарыг хүлээн зөвшөөрч чадахгүй байгаа бөгөөд учир нь Бритни амрах зорилгоор дэлхий даяар нисэх онгоцоор тогтмол аялдаг аж. Түүнчлэн 44 настай Бритни саяхан өөрийн Instagram хуудсандаа дахин хүүхэдтэй болохыг хүсэж байгаагаа цухуйлгасан нь тэдний үл ойлголцлыг улам гүнзгийрүүлжээ.
Эх сурвалжуудын үзэж байгаагаар, энэ явдал нь олон жилийн хөндий байдлын дараа дуучин ээжтэйгээ харилцаагаа сэргээхийг хичээж байсан ах дүүсийн хувьд хүнд цохилт болсон байна. Тэд харилцаагаа аажмаар сайжирч байна гэж найдаж байсан ч Парист болсон явдлын дараа ээжээсээ дахин зайгаа барьжээ.
Сануулахад, Бритни Спирс 2007 онд хүүхдүүдээ асран хамгаалах эрхээ алдсаны дараа Шон Престон, Жейден нар өөрсдийн эцэг Кевин Федерлайнтай хамт амьдарч байсан юм. Сүүлийн үед тэд ээж рүүгээ чиглэсэн хэд хэдэн алхам хийсэн ч энэхүү шинэ гомдол тэдний эвлэрлийг дахин аюулд оруулж байна гэж эх сурвалжууд мэдээлжээ.
