Үндэсний их баяр наадам, Ардын хувьсгал ялсны түүхэн ойн баярыг тохиолдуулан Монгол Улсын Ерөнхийлөгч Ухнаагийн Хүрэлсүхэд АНУ, Япон, БНАСАУ, Франц зэрэг улс орнуудын төрийн тэргүүнүүд баярын мэндчилгээ дэвшүүллээ.
АНУ-ын Ерөнхийлөгч Доналд Ж.Трамп: Стратегийн түншлэл үргэлжлэн гүнзгийрч байна
АНУ-ын Ерөнхийлөгч Доналд Ж.Трамп Америкийн ард түмний нэрийн өмнөөс мэндчилгээ дэвшүүлж, хоёр улсын түншлэл 40 жилийн ойтойгоо золгож буйг онцолсон байна. Тэрбээр мэндчилгээндээ:
- Усны төсөл амжилттай хэрэгжлээ: Түүний анхны бүрэн эрхийн хугацаанд шаваа тавьж байсан Мянганы сорилтын корпорацын Усны компакт төсөл хугацаандаа амжилттай хэрэгжиж, Улаанбаатар хотын иргэдийг найдвартай усаар хангах дэд бүтэц болсонд талархал илэрхийлэв.
- Олон улсын ажиллагаа: Хаити улсад явагдаж буй “Гэмт бүлэглэлтэй тэмцэх хүчин” энхийг дэмжих ажиллагаанд Монгол Улс манлайлан оролцож байгаад талархав.
- Цаашдын хамтын ажиллагаа: Ирэх жилүүдэд АНУ-ын хөрөнгө оруулалтыг тэлж, эрчим хүчний салбарын хамтын ажиллагааг улам гүнзгийрүүлэх хүсэлтэй байгаагаа илэрхийллээ.
Японы Эзэн хаан Нарүхито: Саяхны айлчлалаа талархалтайгаар дурсаж байна
Япон Улсын Цог жавхлант Эзэн хаан Нарүхито Монголын ард түмэнд хөгжил дэвшил, сайн сайхныг хүсэн ерөөв. Тэрбээр “Эрхэм Дээд хатан бид хоёр танай улсад хийсэн саяхны айлчлалаа, тэр үед биднийг халуун дотно, найрсгаар хүлээн авч, зочломтгой хүндэтгэл үзүүлснийг талархалтайгаар эргэн дурсаж байна” хэмээн тэмдэглэжээ.
БНАСАУ-ын Төрийн Зөвлөлийн дарга Ким Жөн Ын баяр хүргэлээ
БНАСАУ-ын Төрийн Зөвлөлийн дарга Ким Жөн Ын Ардын хувьсгал ялсны 105 жилийн ойг тохиолдуулан баярын мэндчилгээ ирүүлсэн байна. Тэрбээр хоёр орны найрсаг харилцаа хоёр ард түмний эрх ашигт нийцэн цаашид улам бүр өргөжин хөгжинө гэдэгт найдаж буйгаа илэрхийлжээ.
Францын Ерөнхийлөгч Эммануэл Макрон: Хамтын ажиллагааны шинэ хуудсыг бичнэ
Бүгд Найрамдах Франц Улсын Ерөнхийлөгч Эммануэл Макрон 2023 онд талууд харилцан төрийн айлчлал хийснээс хойш хоёр орны хамтын ажиллагаа онцгой эрчимжсэнийг дурдлаа.
Тэрбээр эрчим хүч, эрчим хүчний шилжилт, бүтээн байгуулалт, хөдөө аж ахуй болон соёлын салбарт хамтын ажиллагааны шинэ хуудсыг нээнэ гэдэгт итгэлтэй байгаагаа илэрхийлсэн байна. Мөн Монгол Улсад зохион байгуулагдах байгаль орчны сорилтуудыг даван туулах чиглэлтэй СОР17 хурлыг бүрэн дэмжиж, амжилт хүсжээ.
