OpenAI-ийн тэргүүн Сэм Альтман хиймэл оюун ухаан (AI) хурдацтай хөгжиж, өргөн нэвтэрч байгаа ч дэлхийн хөдөлмөрийн зах зээлд “апокалипсис” авчрахгүй гэж мэдэгдлээ. Энэ талаар Reuters мэдээлэв.
“Би буруу бодож байсандаа баяртай байна. Энэ үед AI оффисын ажилтнуудын анхан шатны ажлын байруудад илүү хүчтэй нөлөөлж, бодит байдал дээр болсон хэмжээнээс илүү олон цомхотголд хүргэнэ гэж бодож байсан” хэмээн Альтман Сидней хотод болсон Commonwealth Bank of Australia-ийн бага хуралд видео холбоогоор оролцохдоо онцолжээ.
Түүний хэлснээр AI олон салбар, мэргэжилд улам идэвхтэй нэвтэрч байгаа ч ажлын байранд орлох боломжгүй “хүний хүчин зүйл” хэвээр байна.
Тэрээр Slack дахь зурвас болон цахим шуудангийн хариуг AI-аар бичүүлэхээр туршиж үзсэн ч дараа нь өөрөө хариулах нь зөв гэж үзсэнээ ярьжээ.
“Хүмүүсийн хоорондын харилцаа бидэнд үнэхээр чухал. Миний ажлын маш их цагийг авдаг энэ хэсгийг AI бүрэн гүйцэтгэнэ гэж би одоогоор төсөөлж чадахгүй байна” гэж Альтман хэлсэн байна.
“Манай салбарын зарим компанийн ярьдаг шиг ажлын байрны апокалипсис болно гэж би бодохгүй байна” хэмээн тэр нэмжээ.
