Монголын сагсан бөмбөгийн холбооноос гаргасан албан ёсны хүсэлтийн дагуу Олон улсын сагсан бөмбөгийн холбоо (ФИБА) “ФИБА Агент”-ийн Азийн бүсийн шалгалтыг Монгол Улсад зохион байгуулахаар шийдвэрлэжээ. Уг нэр хүндтэй шалгалт нь 2026 оны наймдугаар сарын 12-ны өдөр нийслэл Улаанбаатар хотноо зохион байгуулагдахаар албан ёсоор товлогдож, горилогчдын бүртгэлийг нээсэн байна.
Монголын сагсан бөмбөгийн спорт болон тамирчдын үнэлэмж олон улсын түвшинд хөгжихийн хэрээр мэргэжлийн гэрээ эрх зүй, зуучлалын асуудал нэн чухал болоод байгаа юм. “ФИБА” лицензтэй агентууд олноор төрөн гарах нь манай улсын сагсан бөмбөгийн хөгжлийг дараагийн шатанд гаргахад дараах голлох үүргийг гүйцэтгэнэ:
- Шилжилт хөдөлгөөн ба гэрээ: Тоглогч болон дасгалжуулагчдын баг хоорондын шилжилт, албан ёсны гэрээ байгуулах үйлцлийг олон улсын стандартын дагуу мөрдүүлнэ.
- Гадаад лигийн хаалга нээгдэнэ: Монгол тамирчид өөр улсын өндөр зэрэглэлийн лигт легионер тоглогчоор очиход хууль эрх зүйн болон зуучлалын найдвартай ар тал бий болно.
- Мэргэжлийн удирдлага: Тамирчны карьер төлөвлөлтийг ФИБА-гийн зөвшөөрөлтэй агентууд хариуцсанаар спортын бизнес зөв голдиролд орно.
Шалгалтад орж, олон улсын агентын лиценз авах сонирхолтой иргэдийн хувьд тогтоосон хугацаанд амжиж бүртгүүлэн, шалгалтын төлбөрийг төлснөөр оролцох эрх нь эцэслэн баталгаажих юм байна.
