Хаврын улирал эхэлж, замын хөдөлгөөнд скүүтер, мопед болон цахилгаан мотоциклын хэрэглээ нэмэгдсэнтэй холбогдуулан Тээврийн цагдаагийн газраас урьдчилан сэргийлэх хяналт шалгалтыг эрчимжүүлээд байна. Тусгай зохицуулалт бүхий энэхүү эргүүл, шалгалт нь өнгөрсөн сарын 10-ны өдрөөс албан ёсоор хөдөлгөөнд оролцож эхэлсэн хоёр дугуйт тээврийн хэрэгслийн жолооч нарын аюулгүй байдлыг хангах, болзошгүй эрсдэлийг бууруулах зорилготой юм. Тэгвэл он гарсаар эхний дөрвөн сарын хугацаанд хоёр дугуйт тээврийн хэрэгсэл осолдсон харамсалтай 78 тохиолдол цагдаагийн байгууллагын хяналтад бүртгэгдсэн байна.
Цагдаагийн алба хаагчид сургуулийн орчны аюулгүй байдалд онцгойлон анхаарч, цахилгаан мотоцикл унасан 30 ажилтан өдөр тутамд хяналтын эргүүлийн үүрэг гүйцэтгэж байгаа аж. Мөн замын хөдөлгөөний дүрэм зөрчсөн, стандартын шаардлага хангаагүй хоёр дугуйтуудыг журамлах ажиллагааг эрчимтэй явуулж байна. Тухайлбал, хууль хяналтын байгууллагын зөрчлийн тайланд дараах тоо баримтууд тэмдэглэгджээ:
- Жолоодох эрхгүйгээр хөдөлгөөнд оролцсон ерөнхий боловсролын сургуулийн сурагчдын 262 цахилгаан мотоциклыг түр саатуулан журамлав.
- Дээрх зөрчлийг гаргасан хүүхдүүдийн эцэг эх, асран хамгаалагчдад хуулийн дагуу 440 нэгжээр торгуулийн арга хэмжээ ногдуулсан байна.
- Тээврийн цагдаагийн албанаас хотын хөдөлгөөнөөс өдөрт дунджаар 160 орчим цахилгаан скүүтер, мопедыг журамлан, эзэмшигч аж ахуйн нэгжүүдэд нь мэдэгдлийн дагуу хүлээлгэн өгч байна.
Хууль тогтоомжийн хүрээнд хоёр дугуйт тээврийн хэрэгслийн хэрэглээнд хатуу хариуцлага тооцохоор заасан байдаг. Хэрэв тохирох ангиллын үнэмлэхгүйгээр тээврийн хэрэгсэл жолоодсон бол асран хамгаалагчийг 400 нэгжээр торгодог бол 16 насанд хүрээгүй хүүхэд скүүтер, мопед унаж замын хөдөлгөөнд оролцвол 100 нэгжийн торгууль хүлээдэг. Түүнчлэн үйлчилгээ үзүүлэхдээ зөрчил гаргасан аж ахуйн нэгж, албан байгууллагыг хамгийн багадаа 1000 нэгжээр торгохоор хуульчилсан тул иргэдийг замын хөдөлгөөнд соёлтой, хариуцлагатай оролцохыг цагдаагийн байгууллагаас анхааруулж байна.
