Ерөнхийдөө лхагва гараг бүрт Засгийн газрын ээлжит хуралдаан болдог ч өнгөрсөн долоо хоногт энэ журам алгасагдсан. Учир нь Ерөнхий сайд Г.Занданшатар болон зарим сайд нар ОХУ-ын Москва хотод болж өнгөрсөн ШХАБ-ын гишүүн орнуудын Засгийн газрын тэргүүн нарын зөвлөлийн өргөтгөсөн хуралдаанд оролцоод ирсэн билээ.
Ингэснээр өнгөрсөн долоо хоногт товлогдсон асуудлуудаа хэлэлцэхийн тулд өнөөдөр /2025.11.24/ 15:00 цагаас Засгийн газрын хуралдааныг нөхөн хийхээр шийдвэрлэсэн байна. Энэ удаагийн хуралдаанд улирлын томуугийн тархалт, бага насны хүүхдүүдийн өвчлөлтэй холбоотой асуудлыг голчлон хэлэлцэж, Ерөнхий сайд холбогдох байгууллагын удирдлагуудтай тусгайлан уулзалт хийхээр төлөвлөжээ.
Хамгийн их хүлээлт үүсгээд буй сэдэв бол сурагчдын өвлийн амралтыг наашлуулах эсэх шийдвэр юм. Өчигдөр Эрүүл мэндийн яам хуралдаж, ерөнхий боловсролын сургуулийн сурагчдын амралтыг хоёр долоо хоногоор урагшлуулж, XII сарын 01-нээс эхлүүлэх санал боловсруулан Боловсролын яаманд хүргүүлээд байна. Боловсролын яам одоогоор албан ёсны шийдвэр гаргаагүй байгаа тул энэ асуудлыг Засгийн газар өнөөдрийн хуралдаанаараа хэлэлцэх магадлал өндөр байна.
Хуралдаанаар:
- Томуугийн өвчлөлийн нөхцөл байдал, авах нэмэлт арга хэмжээ
- Сурагчдын амралтын хугацааг наашлуулах эсэх, график өөрчлөх асуудал
зэрэг тодорхой шийдвэрүүд гарахыг эцэг эх, багш, сургуулиуд онцгой анхааралтай ажиглаж байна.
