Украины Ерөнхийлөгч Владимир Зеленський ойрын хугацаанд Украин, Орос болон АНУ-ын оролцоотой гурван талт уулзалт зохион байгуулагдах гэж байгааг мэдэгдлээ.
Тэрээр АНУ-ын Ерөнхийлөгч Дональд Трамптай хийсэн хэлэлцээнийхээ дараа цаашдын дипломат харилцааны талаар тайлбар өгөхдөө ийнхүү мэдээлсэн юм. Зеленскийн хэлснээр, Америкийн төлөөлөгчид өнөөдөр буюу пүрэв гарагт Москва руу мордож байгаа ажээ.
“Тэд бидний Ерөнхийлөгч Трамптай хийх уулзалтыг хүлээж байсан бол одоо Москва руу явах гэж байна” гэж улсын тэргүүн хэлэв.
Украины баг эхлээд АНУ-ын төлөөлөгчидтэй тусдаа уулзалт хийж, үүний дараа Арабын Нэгдсэн Эмират Улсад гурван талт хэлэлцээ хийхээр төлөвлөж байгааг тэрээр тодотголоо. Боломжит тохиролцооны талаар Зеленський онцлохдоо, буулт хийх бэлэн байдал нь зөвхөн Украины зүгээс бус, харин үйл явцад оролцож буй бүх талуудад байх ёстойг сануулсан юм.
- “Үүнд зөвхөн Украин биш, бүгд бэлэн байх ёстой” гэж тэрээр нэмж хэлэв.
- “Энэ нь ямар ч хэлцэлгүй байснаас хамаагүй дээр” хэмээн тэрээр яриагаа үргэлжлүүлсэн юм.
Зеленський эцэст нь эдгээр дипломат харилцаанууд байлдааны ажиллагааг бүрмөсөн зогсооход хүргэнэ гэдэгт найдаж байгаагаа илэрхийлээд: “Бурхан ивээж, дайн зогсох болтугай. Би үүнд найдаж байна” гэлээ.
