Хөндийн ёроолоос дээш 625 метрийн толгой эргэм өндөрт орших энэхүү хурдны зам Францын алдарт Мийо виадукын (Millau Viaduct) эзэмшиж байсан дэлхийн дээд амжилтыг албан ёсоор эвдлээ.
Хуацзян Гранд-Каньон гүүр дэлхийн хамгийн өндөр гүүрээр тодров
БНХАУ-ын Гүйжоу мужид дэлхийн хамгийн өндөр гүүр болох Хуацзян Гранд-Каньон (Huajiang Grand Canyon Bridge) албан ёсоор нээлтээ хийлээ. Бэйпаньжянь голын түвшнээс дээш 625 метрт “дүүжлэгдсэн” нь инженерчлэлийн түүхэн дэх үнэмлэхүй дээд амжилт юм. Шинэ хурдны зам каньоныг гатлах хугацааг эрс товчилсноос гадна адал явдал эрэлхийлэгч жуулчдыг хэдийнэ татаж эхэлжээ.
Дэлхийн дээд амжилтыг шинэчилсэн энэхүү инженерчлэлийн гайхамшгийн талаар “Moto” хэвлэл мэдээллээ.
Олон жилийн турш өндөр барилга байгууламжийн жишиг стандарт нь Францын өмнөд хэсэгт орших Мийо виадук байсан юм. Түүний хамгийн өндөр багана нь 341 метрт хүрдэг бол Тарн голын хөндий дээгүүрх нийт урт нь 2460 метр билээ. Энэхүү байгууламж Европт төрөлдөө хамгийн өндөр хэвээр байгаа ч дэлхийн тавцанд тэргүүлэх байр сууриа Хятад улсад албан ёсоор шилжүүлэв.
“Хагарсан газар” дээгүүрх бүтээн байгуулалт
Дэлхийн тэргүүн байрны албан ёсны шилжилт 2025 оны 9 дүгээр сарын 28-ны өдөр Хуацзян Гранд-Каньон гүүр ашиглалтад орсноор тохиожээ. Гүйжоу мужийн Бэйпаньжянь гол дээгүүрх энэхүү гүүр нь нутгийн иргэдийн “хагарсан газар” гэж нэрлэдэг сүрлэг каньоныг даван гардаг.
Төслийн гол тоон үзүүлэлтүүд гайхалтай:
- Өндөр: Гүүрний зорчих хэсэг хөндийн ёроолоос дээш рекорд тогтоосон 625 метрт байрлаж байна.
- Үндсэн алслалт (main span): 1420 метр.
- Хугацаа: Барилгын ажил 2022 онд эхэлсэн бөгөөд 3 жил 8 сарын дараа дуусжээ.
Гүүр нь уулын оргилуудын хооронд татсан нарийхан утас шиг харагддаг. Анхны аялагчдын нэг: “Машиндаа сууж явахад гараа сунгаад л үүлсэд хүрч болохоор санагдсан” хэмээн сэтгэгдлээ хуваалцжээ.
Хугацаа хэмнэлт ба экстрем аялал жуулчлал
Шинэ байгууламж нь Люжи-Аньлун хурдны замын чухал хэсэг болсноор Хятадын хамгийн хэцүү уулархаг бүс нутгуудын нэг дэх тээврийн харилцааг ихээхэн сайжруулсан юм. Өмнө нь каньоныг гатлахын тулд уулын тахир замаар хоёр цаг орчим зүдэрч явдаг байсан бол одоо ердөө хоёрхон минут зарцуулдаг болжээ.
Гэхдээ энэхүү инженерчлэлийн гайхамшиг зөвхөн жолооч нарт зориулагдаагүй. Гүүр ашиглалтад орсон даруйдаа бие даасан аялал жуулчлалын бүс болон хувирлаа. Жуулчдад зориулсан ажиглалтын талбай, шилэн явган хүний зам, панорам лифт, тэр байтугай каньоны ангал руу үсрэх банжи-жампинг (bungee jumping) хийх хэсгийг ч байгуулсан байна.
