Боловсролын ерөнхий газрын даргын 2023 оны 12 дугаар сарын 4-ний өдрийн А/420 дугаар тушаалаар батлагдсан “Улсын олимпиад зохион байгуулах журам”-ын хүрээнд ирэх жилийн улсын олимпиадын хуваарь тодорхой боллоо. Тус журамд зааснаар олимпиад зохион байгуулах байгууллага нь Ерөнхий хороо болон Дэд хороо байхаар зохицуулсан байдаг.
2025 оны наймдугаар сарын 22-нд Олимпиадын ерөнхий хороо хуралдаж, 2024-2025 оны хичээлийн жилд зохиогдсон улс, олон улсын олимпиадын үр дүнг дүгнэж, цаашид сайжруулах санал зөвлөмжийг хэлэлцжээ. Үүний үндсэн дээр 2025-2026 оны хичээлийн жилийн олимпиадын хуваарийн товыг баталж, Боловсролын сайдад танилцуулан, Боловсролын яамны саналд тулгуурлан албан ёсоор баталгаажуулсан байна.
Ирэх 2025-2026 оны хичээлийн жилд улсын олимпиад 12 төрлийн хичээлээр зохион байгуулагдах бөгөөд энэ удаагийн шалгаруулалт 2025 оны аравдугаар сарын 20-31-ний өдрүүдэд явагдахаар төлөвлөгджээ. Шалгарсан сурагчид дараагийн шатанд сургууль, аймаг, дүүрэг, нийслэл, улсын олимпиадад өрсөлдөх боломжтой. Улсын олимпиадын аваргыг 2026 онд тодруулах юм.
