“Улаанбаатар травэл экспо-2025” аялал жуулчлалын үзэсгэлэн 11 дэх удаагаа нийслэлийн Улаанбаатар зочид буудлын Их танхимд зохион байгуулагдаж эхэллээ. Үзэсгэлэн 2025 оны 5-р сарын 16-18-ны өдрүүдэд нээлттэй үргэлжлэх бөгөөд иргэд, аялагчдад дотоод болон гадаад аяллаа мэргэжлийн байгууллагуудаар дамжуулан төлөвлөх, аялах хөтөлбөр, багцуудтай танилцах, сонголтоо хийх боломжийг олгож байна.
Үзэсгэлэнгийн гол онцлог, боломжууд
- Дотоод, гадаад аяллын компаниудын хөтөлбөр, үйлчилгээнүүд нэг дор цугларсан.
- Аялагчид аяллын захиалгаа хямдралтай үнээр өгөх боломжтой.
- Улаанбаатар хот болон хөдөө орон нутагт аялал жуулчлалын үйл ажиллагаа явуулдаг компаниуд, үйлчилгээ эрхлэгчдийн мэдээлэл нэг дор төвлөрсөн.
- Иргэд, гэр бүл, найз нөхөд, хамт олноороо аялал амралтаа төлөвлөхөд шаардлагатай мэдээлэл, зөвлөмжийг мэргэжлийн байгууллагуудаас авах боломж бүрдсэн.
Олон улсын оролцогчид, хамтын ажиллагаа өргөжиж байна
Энэ жилийн үзэсгэлэн олон улсын хэмжээнд өргөжиж, гадаад орны төлөөлөгчид, аялал жуулчлалын байгууллагууд, тур оператор компаниуд оролцож, монгол иргэдэд өөрсдийн аяллын бүтээгдэхүүн, үйлчилгээ, хөтөлбөрүүдээ танилцуулж байна.
Тухайлбал:
- БНХАУ-ын Хайнань муж
- БНХАУ-ын Өвөр Монголын Өөртөө Засах Орны аялал жуулчлалын тур оператор, авиа компаниуд болон албаны төлөөлөл оролцож, аяллын шинэ чиглэл, үйлчилгээ, мэдээллийг танилцуулж байгаа юм.
Үзэсгэлэнгийн ач холбогдол
Урин дулаан улирал ирж, иргэд амралт, аяллаа төлөвлөж эхэлж буй энэ үед тус үзэсгэлэнг зохион байгуулснаар нийслэлийн оршин суугчид, аялагчид амралтаа эх орондоо болон хилийн чанадад хэрхэн зөв зохистой, төлөвлөлттэй өнгөрүүлэх талаарх бодит мэдээлэл, зөвлөгөөг нэг дороос авах боломжийг бүрдүүлж буйгаараа онцлог гэж зохион байгуулагчид онцоллоо.
