Монгол Улсын Ерөнхийлөгч У.Хүрэлсүхийн санаачилсан Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслийг Ерөнхийлөгчийн Тамгын газрын дарга А.Үйлстөгөлдөр УИХ-ын дарга Н.Учралд албан ёсоор хүлээлгэн өглөө. Уг төсөлд парламентын гишүүдийн сахилга бат, ёс зүйн хариуцлагыг чангатгах хэд хэдэн зарчмын өөрчлөлтийг тусгажээ.
Шинэчилсэн найруулгаар УИХ-ын гишүүнийг дараах үндэслэлүүдээр эгүүлэн татахаар заасан байна:
- Өргөсөн тангаргаасаа няцсан тохиолдолд;
- Гишүүний ёс зүйн дүрмийг удаа дараа болон ноцтой зөрчсөн бол;
- Гэмт хэрэг үйлдсэн нь шүүхийн эцсийн шийдвэрээр нотлогдсон бол.
Дээрх тохиолдол бүрийг УИХ-ын Ёс зүйн дэд хороо болон нэгдсэн чуулганаар заавал нээлттэй хэлэлцэж, Үндсэн хуулийн Цэцийн шийдвэрийг үндэслэн эгүүлэн татах зохицуулалт хийх юм. Түүнчлэн гишүүдийн ажлын хариуцлагыг нэмэгдүүлэх үүднээс ээлжит чуулганы хуралдаан болон санал хураалтын ирцийг 70-аас доошгүй хувьтай байх босгыг тогтоожээ.
Хуулийн төсөл батлагдсанаар ард түмнээс олгосон мандатыг хүндэтгэх, парламентын засаглалыг бэхжүүлэх болон улс төрийн намуудын хариуцлагыг өндөржүүлэхэд томоохон түлхэц болно гэж үзэж байна. Мөн Монгол Улсын Их Хурлын тухай хуулийн 7 дугаар зүйлийн 7.2 дахь хэсэгт “ёс зүйн хэм хэмжээг чандлан сахиж” гэх нэмэлт заалтыг оруулснаар хууль тогтоогчдын ёс зүйн хариуцлага ил тод, бодитой болох нөхцөл бүрдэх юм.
Энэхүү шинэчлэл нь Үндсэн хуульт ёсны зарчмыг сахиулах, парламентад итгэх иргэдийн итгэлийг сэргээхэд чиглэсэн түүхэн ач холбогдолтой алхам болохыг албаныхан онцолж байна.
